BAKI, AzerVoice
Pakistan ordusu Hindistandan havaya qalxdığı bildirilən və ölkənin hava məkanını pozan 25 pilotsuz uçuş aparatını (PUA) vurduğunu açıqlayıb.
AzerVoice xəbər verir ki, vurulan PUA-lar İsrail istehsalı olub və hücumlar əsasən Kəraçi, Lahor və Ravalpindi şəhərlərində qeydə alınıb.
Pakistan Silahlı Qüvvələrinin sözçüsü Əhməd Şərif Çaudrinin verdiyi açıqlamaya əsasən, Ravalpindi üzərində ordunun Baş Qərargahının yerləşdiyi ərazidə daha bir pilotsuz aparat vurulub.
Lahor yaxınlığındakı hərbi hədəfə edilən PUA hücumu nəticəsində 4 əsgərin yaralandığı bildirilib.
“Hindistan bu açıq təcavüzün bədəlini ağır şəkildə ödəyəcək”- deyə Çaudri bildirib.
Çaudri bildirib ki, vurulan PUA-ların qalıqları toplanır və Pakistan bu hücumları açıq hərbi təxribat kimi qiymətləndirir: “Hindistan bu açıq təcavüzün bədəlini ağır şəkildə ödəyəcək,” – deyə o xəbərdarlıq edib.
Hindistan Müdafiə Nazirliyi Pakistanın son hücumlarına cavab olaraq bu gün Pakistan ərazisində yerləşən radar və hava hücumundan müdafiə mövqelərinə zərbələr endirdiyini açıqlayıb. Nazirliyin məlumatına görə, Pakistanın ötən gecə və bu gün səhər saatlarında Hindistanın şimal və qərb bölgələrinə pilotsuz uçuş aparatları və raketlərlə hücum cəhdləri hava hücumundan müdafiə sistemləri vasitəsilə dəf olunub.
Eyni zamanda, Kəşmirin nəzarət xətti boyunca baş verən artilleriya atışmaları nəticəsində Hindistan 13 mülki şəxsin həlak olduğunu, 59 nəfərin isə yaralandığını bəyan edib. Pakistan isə bu hücumlarda azı 31 mülki şəxsin öldüyünü, 50-dən çox insanın yaralandığını bildirib.
İslamabad bu gün əlavə olaraq beş Hindistan qırıcısının vurulduğunu açıqlasa da, Hindistanın Pekindəki səfirliyi bu məlumatı “dezinformasiya” adlandırıb. İki ölkə arasındakı qarşıdurma Hindistanın iki həftə əvvəl Pakistanı Kəşmirdə 26 nəfərin ölümünə səbəb olan hücumda ittiham etməsindən sonra pik nöqtəyə çatıb.
Regionda artan hərbi gərginlik iqtisadi göstəricilərə də mənfi təsir edib. Pakistan fond birjası 6,3 faiz dəyər itirdikdən sonra müvəqqəti olaraq ticarəti dayandırıb. Hindistanda isə rupinin dəyəri azalıb, səhmlər və istiqraz bazarları da mənfi tendensiya göstərib.
Hindistanın Pəncab əyalətində, xüsusilə sərhəd bölgələrində panik alış-veriş dalğası başladığı müşahidə olunub. Əhali ərzaq və əsas ehtiyac mallarını ehtiyat üçün yığmağa başlayıb. Pakistan isə təhlükəsizlik tədbirləri çərçivəsində Lahor, Kəraçi və Sialkot hava limanlarında uçuşları müvəqqəti dayandırıb.
Çin Xarici İşlər Nazirliyi vəziyyətin daha da gərginləşməsinin qarşısını almağa çağıraraq bildirib ki, Pekin sülh və sabitlik üçün beynəlxalq ictimaiyyətlə birgə hərəkət etməyə hazırdır. Rusiya və ABŞ da oxşar çağırış edərək tərəfləri diplomatik dialoqa çağırıblar.
