BAKI, AzerVoice
HƏMAS, İsrail ordusunun gecə saatlarında Qəzza zolağına qarşı həyata keçirdiyi hücumlardan sonra yeni bəyanat yayıb.
AzerVoice xəbər verir ki, bəyanatda HƏMAS bütün İslam ölkələrinə çağırış edərək İsraili qınamaqla kifayətlənmək əvəzinə, konkret addımlar atılmasının vaxtının çatdığını vurğulayıb:
"HƏMAS, ərəb və islam ölkələrini, Birləşmiş Millətlər Təşkilatını və onun qurumlarını qınama paradoksundan çıxmağa və işğalçıların (İsrail nəzərdə tutulur - red.) 21 aydır günahsız mülki əhaliyə qarşı törətdiyi qətliam, aclıqla cəzalandırma və bütün həyati ünsürlərin məhv edilməsi kimi sistematik müharibə cinayətlərini dayandırmaq üçün fəal şəkildə hərəkətə keçməyə çağırır."
Qeyd edək ki, HƏMAS ötən gecə verdiyi açıqlamada Qəzzada İsraillə atəşkəs və əsir mübadiləsi təklifinə müsbət cavab verdiyini və bu atəşkəsin həyata keçirilməsi üçün danışıqlara hazır olduğunu vasitəçilərə bildirmişdi. Lakin atəşkəs danışıqları davam etdiyi vaxtda, İsrail ordusu bu gün səhər saatlarından etibarən Qəzza zolağının müxtəlif bölgələrinə hücumlar təşkil edib. Bu hücumlar nəticəsində aralarında qadın və uşaqların da olduğu 55 fələstinli həlak olub, çox sayda insan isə yaralanıb.
