BAKI, AzerVoice
Beynəlxalq Cinayət Məhkəməsi (BCM) İsrailin Baş naziri Benyamin Netanyahunu və sabiq müdafiə naziri Yoav Qalant barəsində çıxarılmış həbs orderlərinin ləğv edilməsi ilə bağlı müraciəti rədd ediblər.
AzerVoice-un məlumatına görə, məhkəmə, həmçinin İsrailin Qəzza zolağındakı müharibə ilə bağlı BCM-nin yurisdiksiyasına dair irəli sürdüyü etirazlar üzrə qərar verənədək həmin orderlərin qüvvədə qalmasına qərar verib.
Məhkəmənin rəsmi saytında yayımlanan qərara görə, hakimlər həmçinin İsrailin BCM-nin Fələstin ərazilərində törədildiyi hərbi əməliyyatlarla bağlı apardığı genişmiqyaslı istintaqı dayandırmaq tələbini də rədd ediblər.
Qeyd edək ki, Beynəlxalq Cinayət Məhkəməsi 21 noyabr tarixində Netanyahunun, Qalantın və HƏMAS lideri Məhəmməd Diyab İbrahim əl-Misrinin barəsində Qəzzada müharibə cinayətləri və insanlığa qarşı cinayətlər törətmək ittihamı ilə həbs qərarları çıxarmışdı.
Məhkəmə daha sonra, fevral ayında, əz-Misrinin öldüyünə dair etibarlı məlumatlar daxil olduğu üçün onun barəsindəki həbs orderini geri götürdüyünü açıqlamışdı.
İsrail, qərargahı Haaqada yerləşən BCM-nin yurisdiksiyasını tanımır və Qəzzada hərbi cinayət törətmədiyini iddia edir. İsrail 2023-cü il oktyabrın 7-də HƏMAS tərəfindən həyata keçirilən hücuma cavab olaraq bu hərbi əməliyyatları keçirdiyini və məqsədinin HƏMAS-ı sıradan çıxarmaq olduğunu bildirir. Bu səbəbdən Netanyahu və Qalant barəsindəki həbs qərarlarına qarşı apellyasiya verib.
İsrail hesab edir ki, apellyasiya palatasının İsrailin BCM-nin yurisdiksiyası ilə bağlı irəli sürdüyü etirazların yenidən nəzərdən keçirilməsi barədə göstərişi bu həbs qərarlarının hüquqi əsasının olmadığını göstərir.
Lakin BCM hakimləri bu arqumenti qəbul etməyiblər və bu gün bildiriblər ki, İsrailin həbs qərarları ilə bağlı hüquqi apellyasiya prosesi hələ də davam edir və həmin orderlər məhkəmə bu məsələ üzrə yekun hökm verənədək qüvvədə qalacaq.
Hazırda bu yurisdiksiya məsələsi üzrə hökmün nə vaxt çıxarılacağına dair konkret vaxt cədvəli yoxdur.
Qeyd edək ki, iyun ayında ABŞ, Benyamin Netanyahunun həbsi ilə bağlı BCM tərəfindən çıxarılan orderə cavab olaraq məhkəmənin dörd qadın hakiminə qarşı misli görünməmiş şəkildə sanksiyalar tətbiq edib. Həmin dörd hakimin ikisi İsrailin müraciətini rədd edən komitənin tərkibində iştirak edib.
