BAKI, AzerVoice, Orxan Qədirzadə
Sudanda ordu ilə toqquşan “Sürətli Dəstək Qüvvələri” (RSF) ABŞ-ın humanitar yardım üçün nəzərdə tutulan atəşkəs təşəbbüsünə razılıq verib.
AzerVoice-un məlumatına görə, RSF tərəfindən yayılan açıqlamada humanitar fəaliyyətlərin həyata keçirilməsi üçün atəşkəs planına razılıq verildiyi bildirilib. Ancaq tərəflər arasında 2023-cü ildən bəri davam edən döyüşlərin bir çox bölgədə fasilələrlə davam etdiyi qeyd olunur.
BMT-nin məlumatına əsasən, 2023-cü ildən bu yana Sudandakı silahlı qarşıdurmalar nəticəsində 40 mindən çox insan həlak olub. Toqquşmalar səbəbilə 14 milyondan artıq sakin evlərini tərk etmək məcburiyyətində qalıb, təxminən 375 min nəfərin isə aclıq təhlükəsi ilə üz-üzə qaldığı bildirilir.
Ölkədə gərginlik 2019-cu ildə eks-prezident Ömər əl-Bəşirin devrilməsindən sonra yaranıb. Həmin il mülki və hərbi nümayəndələrdən ibarət keçid hökuməti qurulub və Abdulla Hamduk baş nazir təyin edilib. Lakin 2021-ci ilin oktyabrında ordu və RSF tərəfindən həyata keçirilən çevriliş nəticəsində Hamduk vəzifəsindən uzaqlaşdırılıb.
Daha sonra ağır iqtisadi böhran fonunda etirazlar kütləvi xarakter alıb və ordu ilə RSF arasında güc mübarizəsi 15 aprel 2023-cü ildə açıq silahlı qarşıdurmaya çevrilib.
