Bakı,AzerVoice, Orxan Qədirzadə
ABŞ Nümayəndələr Palatasının Nəzarət Komitəsi tərəfindən açıqlanan yeni sənədlər, ABŞ-lı maliyyəçi və azyaşlılara qarşı cinsi cinayətlərə görə məhkum edilmiş Cefri Epşteynin Hindistan siyasətinə təsir göstərmək cəhdlərini və Baş nazir Narendra Modinin hakim dairələri ilə əlaqələrini üzə çıxarıb.
AzerVoice xəbər verir ki, sənədlərə görə, Epşteyn 2019-cu ilin ortalarında - həbsindən təxminən iki ay əvvəl - Modi ilə keçmiş Ağ Ev müşaviri Stiv Bannon arasında görüş təşkil etməyi təklif edib. Həmçinin onun Hindistanda nüfuzlu siyasi və biznes fiqurları ilə əlaqə saxladığı, o cümlədən İsrail müdafiə sənayesi ilə əməkdaşlıq edən hindistanlı milyarderə Hindistan–İsrail münasibətləri barədə mesajlar göndərdiyi bildirilir.
ABŞ mediasının məlumatına əsasən, Epşteynin İsrail kəşfiyyat strukturları ilə yaxın əlaqələri olub. Onun Hindistanla təmasları, 2017 və 2018-ci illərdə Modi və Benyamin Netanyahu arasında keçirilmiş rəsmi səfərlərdən sonra genişlənib. Həmin dövrdə kibertəhlükəsizlik, aviasiya və enerji sahələrində anlaşmalar imzalanıb, 2019-cu ildə isə Hindistan İsrail silahlarının ən böyük alıcısına çevrilib.
Sənədlər həmçinin göstərir ki, Epşteyn cinsi cinayətlərə görə məhkum olunduqdan sonra belə hakimiyyət partiyasının yüksək səviyyəli nümayəndəsi Hardeep Singh Puri ilə bir neçə dəfə görüşüb. Bu müddətdə o, beynəlxalq layihələrdə iştirak edib və İsrail hökuməti və kəşfiyyatla əlaqəli şirkətlərin maraqlarını təşviq edib.
23 may 2019-cu ildə - Modinin yenidən Baş nazir seçildiyi gün - Bannon Epşteynə Hindistanla bağlı təqdimat hazırlayacağını yazıb. Epşteyn cavabında diqqətinin “Çinin qarşısının alınmasına” yönəldiyini bildirib və görüşün tezləşdirilməsini istəyərək deyib ki, “Mən görüşü təşkil edə bilərəm. Modiylə görüşməlisən.” Bannon cavabında “olar” deyib. Daha sonra Epşteyn yeni mesaj göndərərək “Modi xəttədir.”-deyib.
