BAKI, AzerVoice

“Fələstin xalqının kollektiv əzabına heç nə haqq qazandıra bilməz.”

AzerVoicexəbər verir ki, Birləşmiş Millətlər Təşkilatının (BMT) baş katibi Antonio Quterreş Ərəb Liqasının Bağdadda keçirilən 34-cü Zirvə Toplantısında çıxış edərək, Qəzza zolağında baş verən humanitar böhrana diqqət çəkib. O bildirib ki, bölgə və dünya Qəzzadan başlayaraq ciddi sınaqlarla üz-üzə qalıb və Fələstin xalqının çəkdiyi kollektiv əzaba heç bir əsasla haqq qazandırmaq mümkün deyil.

“Qəzzədən başlayaraq, region və dünya böyük problemlərlə qarşı-qarşıyadır. Fələstin xalqının kollektiv əzabına heç nə haqq qazandıra bilməz”, – deyə Quterreş vurğulayıb.

O, eyni zamanda Fələstin xalqının məcburi köçkün vəziyyətinə salınmasına qarşı olduqlarını bildirib və bölgədəki digər böhranlı vəziyyətlərə də münasibət bildirib. Quterreş Livan, Suriya, Yəmən, Sudan və Liviya kimi ölkələrdəki gərginliyə toxunaraq , “Livanın ərazi bütövlüyü və suverenliyi qorunmalı və ona hörmət edilməlidir. Suriyanın suverenliyi və müstəqilliyi həyati əhəmiyyət kəsb edir. Yəməndə həll yolu yalnız yəmənlilər arasında birbaşa dialoqla mümkündür. Sudanda zorakılıq dərhal dayandırılmalı və təcili tədbirlər görülməlidir.” - deyə o fikirlərini şərh edib.

Liviyadakı vəziyyətə də toxunan BMT baş katibi qeyd edib ki, sabitliyin təmin edilməsi üçün beynəlxalq tərəfdaşlarla əlaqələr saxlanılır və münaqişənin həlli üçün bütün səylər səfərbər olunub.

Quterreş həmçinin İraq hökumətini və xalqını dəstəklədiklərini də xüsusi olaraq vurğulayıb.