Sudanda davam edən müharibə ölkənin elektrik şəbəkəsinə ciddi ziyan vurduğu üçün əhali uzunmüddətli elektrik kəsintilərindən çıxış yolu kimi günəş enerjisinə üz tutur. Lakin günəş panelləri və digər avadanlıqların yüksək qiyməti bu alternativdən istifadənin imkanlarını məhdudlaşdırır.
ArabAZ xəbər verir ki,Sudan ordusu ilə Çevik Dəstək Qüvvələri (RSF) arasında 2023-cü ilin aprelindən davam edən döyüşlər nəticəsində ən azı 59 min insan həlak olub, təxminən 13 milyon nəfər isə evlərini tərk edib. Münaqişə onsuz da zəif olan elektrik infrastrukturuna ciddi zərər vurub. BMT-nin İnkişaf Proqramının hesablamalarına görə, elektrik şəbəkəsinə dəyən zərərin həcmi 3 milyard dollar təşkil edir.
Xartum yaxınlığındakı Omdurmanda yaşayan sakinlər bildirirlər ki, bəzi ərazilərdə elektrik enerjisinin kəsilməsi 16 saata qədər davam edir. Bu vəziyyət xüsusilə isti hava şəraitində məktəblərdə təhsili və gündəlik həyatı çətinləşdirir.
Elektrik enerjisi ilə bağlı problemlər səhiyyə sisteminə də təsir göstərir. Məsələn, insulin kimi temperatur həssas dərmanların saxlanılması çətinləşib. Sudan Həkimlər Şəbəkəsi uzunmüddətli elektrik kəsintilərinin xəstəxanalarda, xüsusilə daim tibbi nəzarətə ehtiyacı olan böyrək xəstələri üçün ciddi risk yaratdığı barədə xəbərdarlıq edib.
Dünya Bankının məlumatına görə, Sudan əhalisinin ən azı 30 faizi elektrik enerjisinə çıxış imkanından məhrumdur. Şəbəkəyə qoşulmuş şəhərlərdə də vəziyyət pisləşib. Müharibədən əvvəl ölkədə elektrik enerjisi istehsalı 4 400 meqavat olduğu halda, hazırda bu göstərici təxminən 1 100 meqavata düşüb. Bir sıra elektrik stansiyaları RSF-nin pilotsuz uçuş aparatlarının hücumları nəticəsində zərər görüb.
Elektrik enerjisinin çatışmazlığı günəş panellərinə tələbatı artırıb. Paytaxt Xartumda günəş panelləri, batareyalar və invertorların satışı ilə bağlı elanların sayı artıb. Lakin tipik bir ailə üçün 10 kilovatlıq günəş enerjisi sistemi təxminən 5 min dollara başa gəlir ki, bu da aşağı gəlirli ailələr üçün ciddi maliyyə yüküdür.
BMT-nin məlumatına görə, Sudan günəş enerjisi istehsalı üçün böyük potensiala malikdir və ölkənin bəzi ərazilərində günəşli saatların sayı ildə 4 mini keçir. Bununla belə, idxal olunan günəş enerjisi sistemlərinin yüksək ilkin qiyməti və milli valyutanın dəyərdən düşməsi bu keçidi çətinləşdirir.
