BAKI, AzerVoice

İranın Milli Təhlükəsizlik Şurası, aldadılaraq və ya bilərəkdən İsraillə əməkdaşlıq edən şəxslərə müraciət edib.

AzerVoice xəbər verir ki, müraciətdə deyilir:

“İsrail tərəfindən aldadılmış, bilərəkdən və ya bilmədən sionist rejimlə əlaqəyə girmiş şəxslər 22 iyun tarixindən özlərini aidiyyəti qurumlara təslim edərlərsə, İslam rəhməti çərçivəsində cəzadan azad edilə bilərlər.

Bu tarixədək təslim olmayan şəxslər müharibə şəraitində düşmənlə əməkdaşlıq edən beşinci kolon kimi qiymətləndiriləcək və casusluq və ya hərbi əməkdaşlıq ittihamı ilə ən ağır cəzalarla üzləşəcəklər."

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.