BAKI, AzerVoice
Qüds Dairə Məhkəməsi İsrailin Baş naziri Benyamin Netanyahunun müdafiə tərəfinin müraciətini qismən qəbul edərək onun korrupsiya işləri üzrə keçirilən dinləmələrdə ifadə verməsini bir həftəlik təxirə salıb.
AzerVoice xəbər verir ki, bu barədə "Ynet" portalı məlumat yayıb.
Məlumata görə, qərar bağlanmış iclasdan sonra, Netanyahunun şəxsi müraciəti əsasında verilib. İclasda İsrail Müdafiə Qüvvələrinin Hərbi Kəşfiyyat İdarəsinin rəhbəri Şlomi Binder və "Mossad"ın direktoru David Barnea da iştirak ediblər. Məhkəmənin qərarında qeyd olunub: “Təqdim olunan izahlara əsasən, müraciət qismən təmin edilir və bu mərhələdə 30 iyun və 2 iyul tarixlərinə təyin olunmuş ifadəvermə seansları ləğv olunur”.
İsrailin "Kan" telekanalının məlumatına görə, müdafiə tərəfinin ikinci həftəlik təxirə salma tələbi ilə bağlı qərar sonradan veriləcək.
Qeyd edək ki, Netanyahunun vəkilləri iyunun 27-də məhkəməyə müraciət edərək, İranla yaşanan gərginlik və digər regional hadisələr səbəbindən baş nazirin bütün diqqətini siyasi və təhlükəsizlik məsələlərinə, o cümlədən Qəzza müharibəsinə və girovların azad olunması problemilə məşğul olmağa yönəltməsinin vacibliyini bildirərək iki həftəlik təxir istəmişdilər. Həmin müraciət ilk mərhələdə rədd olunmuşdu.
Xatırladaq ki, 2019-cu il noyabrın 21-də İsrailin baş prokuroru Netanyahunun rüşvət, dələduzluq və ictimai etimada xəyanət maddələri ilə ittiham olunacağını açıqlamışdı. Baş nazir bütün ittihamları rədd edib. İttiham aktları 2020-ci il yanvarın 28-də Qüds Dairə Məhkəməsinə təqdim olunub.
