BAKI, AzerVoice, Səməd Əyyubov
Səudiyyə Ərəbistanı İsrailin Qəzzanın işğal edilməsi ilə bağlı qərarını pisləyib.
AzerVoice xəbər verir ki, bu barədə Səudiyyə Ərəbistanının Xarici İşlər Nazirliyi bəyanat yayıb.
“İsrail hakimiyyətinin heç bir məhdudiyyət tanımadan qəbul etdiyi bu qeyri-insani fikirlər və qərarlar bir daha göstərir ki, onlar Fələstin xalqının bu torpaqlara olan tarixi və hüquqi bağlılığını anlamır və bu xalqın beynəlxalq hüquq və insani prinsiplərə əsaslanan qanuni haqqını tanımır” - deyə, bəyanatda qeyd olunub.
Səudiyyə Ərəbistanı beynəlxalq ictimaiyyəti və BMT Təhlükəsizlik Şurasını (BMT TŞ) İsrailin işğalçı fəaliyyətlərini dərhal dayandırmağa çağırıb. Bəyanatda qeyd olunub ki, bu qurumların davam edən acizliyi beynəlxalq nizam və hüququn əsaslarını sarsıdır, regional və qlobal miqyasda sülh və təhlükəsizliyə ciddi təhdid yaradır və soyqırımı ilə zorakı köçürmə kimi dəhşətli cinayətlərə zəmin yaradır.
"İsrailin bu ardıcıl cinayətləri beynəlxalq ictimaiyyəti qətiyyətli mövqe ortaya qoymağa vadar etməlidir. Bu mövqe Fələstin xalqının üzləşdiyi humanitar fəlakətin qarşısının alınmasına və beynəlxalq hüququn dəstəklədiyi iki dövlətli həll yolunun reallaşdırılmasına yönəlməlidir. Bu isə 1967-ci il sərhədləri çərçivəsində paytaxtı Şərqi Qüds olan müstəqil Fələstin dövlətinin qurulması ilə mümkündür və BMT qətnamələrinə əsaslanmalıdır" - deyə, bəyanatda vurğulanıb.
Qeyd edək ki, İsrail Təhlükəsizlik Kabineti ötən gün Qəzza şəhərinin işğalı ilə bağlı yeni planı təsdiqləyib. Bu qərar bölgədə gərginliyi daha da artırıb və beynəlxalq aləmdə, o cümlədən Türkiyə və Almaniyada kəskin reaksiyalara səbəb olub.
