BAKI, AzerVoice, Səməd Əyyubov
Fələstin bir sıra ölkələrlə birgə BMT Təhlükəsizlik Şurasının (BMT TŞ) təcili iclasının çağırılmasını tələb edib.
AzerVoice xəbər verir ki, bu haqda Fələstinin BMT-dəki daimi müşahidəçisi Riyad Mansur məlumat verib.
Mansurun sözlərinə görə, bir neçə ölkə Təhlükəsizlik Şurasının iclasının avqustun 9-da keçirilməsində israr edir.
“Biz bu görüşün mümkün qədər tez baş tutmasını istəyirik” – deyə, o bildirib.
Fələstin nümayəndəsi əlavə edib ki, iclasın əsas məqsədi İsrailin son dərəcə təhlükəli hərbi eskalasiyasını dayandırmaqdır. O, beynəlxalq ictimaiyyətin İsrail Baş naziri Benyamin Netanyahunun rəhbərliyi altında həyata keçirilməsi planlaşdırılan əməliyyatların qarşısını ala biləcəyinə ümid etdiyini vurğulayıb.
Qeyd edək ki, İsrail Təhlükəsizlik Kabineti ötən gün Qəzza şəhərinin işğalı ilə bağlı yeni planı təsdiqləyib. Bu qərar bölgədə gərginliyi daha da artırıb və beynəlxalq aləmdə, o cümlədən Türkiyə və Almaniyada kəskin reaksiyalara səbəb olub.
