BAKI, AzerVoice, Səməd Əyyubov
İsrail ordusu Yəmənin paytaxtı Sənada prezident sarayına və husilərə (“Ənsar Allah” hərəkatı) məxsus hərbi obyektlərə zərbələr endirib.
AzerVoice xəbər verir ki, bu barədə ordunun mətbuat xidməti məlumat yayıb.
Bildirilib ki, hədəflər arasında prezident sarayı, iki elektrik stansiyası və yanacaq anbarı olub.
“Bir müddət əvvəl İsrail Müdafiə Ordusu Səna bölgəsində husilərə məxsus hərbi infrastruktura zərbələr endirib. Hədəflərə prezident sarayının yerləşdiyi hərbi obyekt, ‘Asar’ və ‘Xizaz’ elektrik stansiyaları, həmçinin yanacaq saxlama məntəqəsi daxil idi” - deyə, açıqlamada bildirilib.
İsrailin 12-ci kanalı isə, bu hava hücumlarının Yəmən ərazisindən raket və pilotsuz uçuş aparatlarının (PUA) atılmasına cavab olaraq həyata keçirildiyini bildirib.
Qeyd edək ki, iyulun 27-də “Ənsar Allah” hərəkatı (husilər) Qəzza zolağına dəstək olaraq İsrail limanları ilə əlaqəsi olan, milliyyətindən asılı olmayaraq bütün gəmiləri hədəf alacağını və İsrailə qarşı dəniz əməliyyatlarını artıracağını bəyan etmişdi.
