BAKI, AzerVoice, Nailə Babazadə
İsrailin hücumları və blokadası səbəbindən qıtlıq yaşayan Qəzza Zolağında son 24 saat ərzində, 3-ü uşaq olmaqla 10 nəfər daha aclıqdan həyatını itirib, 2023-cü il oktyabrın 7 -dən bu yana aclıq səbəbindən ölənlərin sayı 332-yə yüksəlib.
AzerVoice xəbər verir ki, Qəzza Sağlıq Nazirliyi yazılı açıqlamasında, aclıqdan həyatını itirənlər barədə son məlumatları təqdim edib.
Birləşmiş Millətlər Təşkilatının (BMT) dəstəklədiyi İnkişaf etmiş Qida Təhlükəsizliyi Səviyyəsi (IPC) tərəfindən yayımlanan son hesabatda, "15 avqust 2025-ci il tarixində Qəzza şəhərindəki aclığın 'fəlakət səviyyəsi' adlanan 5-ci səviyyəyə çatdığı və bunun sübutlarla təsdiqləndiyi" bildirilib.
IPC-nin hesabatında, "22 aylıq amansız müharibələrdən sonra Qəzza Zolağında yarım milyondan çox insan aclıq, yoxsulluq və ölüm şəraiti ilə üzləşib" ifadəsi yer alıb.
Qeyd edək ki, İsrailin əsasən Qəzza zolağının şimalı olmaqla müxtəlif bölgələrə təşkil etdiyi hücumlarda 4 fələstinli həlak olub.
Xəstəxana mənbələri və hadisə şahidlərinin verdiyi məlumata görə, İsrailin Qəzza şəhərini işğal planı çərçivəsində Zeytun və Şeyx Ridvan məhəllələri başda olmaqla bir çox əraziyə intensiv hücumlar həyata keçirilib.
İsrail döyüş təyyarələri Qəzzanın şimalındakı əl-Kərame məhəlləsində bir evi hədəfə alıb. Hücumda bir ana və uşağı həlak olub, 2 nəfər isə yaralanıb.
İsrailin Qəzza şəhərindəki əl-Vahdə küçəsində başqa bir evi hədəf aldığı hücumda bir fələstinli qadın həyatını itirib.
Digər tərəfdən, Qəzza şəhərində yaşayan insanlar Zeytun və Şeyx Ridvan məhəllələri və onların ətrafında baş verən güclü partlayış və silah səsləri altında qorxu dolu bir gecə keçiriblər.
İsrailin "I24NEWS" kanalı İsrail ordusunun bölgədə irəlilədiyini, hava və ağır artilleriya atəşi ilə hücumlar təşkil etdiyini, Qəzza şəhərinin kənar hissələrində şiddətli döyüşlərin baş verdiyini qeyd edib.
Bəzi sosial media hesablarında Qəzza zolağında İsrail əsgərlərinin ölümü ilə nəticələnən bir sıra "çətin" təhlükəsizlik hadisələri ilə bağlı xəbərlərin paylaşılmasına davam edilir.
Beynəlxalq mənbələrin bildirdiyinə görə, İsrail, fələstinli qrupların hücumları nəticəsində baş verən itkilərlə bağlı mediaya ciddi hərbi senzura tətbiq edir. Bu addımın səbəblərindən biri də ictimaiyyətin mənəviyyatını qorumağa yönəlik səylərdir.
Bəzi xəbərlərdə dörd İsrail əsgərinin fələstinli qruplar tərəfindən əsir alındığı və ordunun "Hannibal Protokolu"nu işə sala biləcəyi ilə bağlı narahatlıqların artdığı qeyd olunur.
Hannibal Protokolu, əsirlərin xilas edilməsi mümkün olmadıqda, onları əsir alanlarla birlikdə məhv edilməsini nəzərdə tutur.
Qəzza zolağının mərkəzində yerləşən Deyr əl-Bələh şəhərinin Salahəddin küçəsini hədəfə alan İsrail hücumunda bir fələstinli həlak olub, çox sayda insan yaralanıb.
Qəzza zolağının cənubundakı Xan Yunusun şimal-qərbində yerləşən Asda bölgəsində isə İsrail hərbi texnikasından məcburi köçkünlərin çadırlarına atəş açılması nəticəsində bir fələstinli ağır yaralanıb.
İsrailin Qəzza zolağındakı fələstinlilərə qarşı təxminən iki ildir davam edən soyqırımının əsas mərhələlərindən biri olan Qəzza şəhərini işğal etmə cəhdi dünən etibarilə rəsmi olaraq başlanmışdı.
İsrail hökuməti 8 avqust tarixində, Baş nazir Benyamin Netanyahu tərəfindən irəli sürülən və Qəzza şəhərindən başlayaraq bütün Qəzza zolağını mərhələli şəkildə yenidən işğal etməyi hədəfləyən planı təsdiqləmişdi.
