BAKI, AzerVoice, Nailə Babazadə
Qəzzada jurnalistlərin hədəf alınıb öldürülməsinə qarşı dünya miqyasında etiraz aksiyası keçirilir. Təxminən 200-ə yaxın media qurumunun iştirak etdiyi təşəbbüs, İsrailin hücumlarında həyatını itirən jurnalistlərə diqqət çəkməyi hədəfləyir.
AzerVoice xəbər verir ki, Beynəlxalq Sərhəd Tanımayan Jurnalistlər (RSF), Avaaz və Beynəlxalq Jurnalistlər Federasiyasının (IFJ) rəhbərliyi ilə təşkil edilən aksiyada 50 fərqli ölkədən media orqanları iştirak edəcək.
Etiraz çərçivəsində bəzi qəzetlər qara üzlüklə çıxacaq, televiziya və radio kanalları yayımlarını dayandıracaq, rəqəmsal media qurumları isə əsas səhifələrini qaraldacaq.
IFJ-nin məlumatlarına görə, 7 oktyabr 2023-cü ildən bəri Qəzzada azı 210 jurnalist həyatını itirib. Bu rəqəm, müasir dövrdə bir münaqişədə qeydə alınan ən yüksək göstərici kimi diqqət çəkir.
İsrailin beynəlxalq medianın Qəzzada sərbəst fəaliyyətinə icazə verməməsi səbəbindən bölgədə xəbərçilik, ağır hücumlar altında çalışan fələstinli jurnalistlərin çiyinlərinə düşür.
Etiraz qərarı, son həftələrdə baş verən ağır itkilərdən sonra alınıb. Avqustun əvvəlində İsrail Qəzzada “Əl Cəzirə” televiziyasının beş əməkdaşını hədəfə aldı. Həlak olanlar arasında ərəb dünyasında münaqişəni gündəlik işıqlandıran Anas Əl-Şərif də var idi.
Ötən həftə isə Xan Yunisdə yerləşən Nasser Xəstəxanası ard-arda üç hücumla vuruldu. İlk partlayışdan sonra yaralılara yardım edən mülki şəxslər və hadisəni izləyən jurnalistlər ikinci və üçüncü hücumlarda həyatlarını itirdilər. Bu üsul hərbi terminologiyada “ikiqat zərbə” (double-tap) kimi tanınır.
CNN-in əldə etdiyi görüntülərdə ikinci hücumun əslində demək olar ki, eyni anda həyata keçirilən iki ayrı bombardmandan ibarət olduğu və çoxsaylı insan tələfatına bunun səbəb olduğu müəyyən edilib.
Soyqırımın baş memarı Benyamin Netanyahu bu hadisəni “faciəvi bir səhv” adlandırıb.
RSF-in açıqlamasında qeyd olunub ki, jurnalistlər təkcə öldürülmür, eyni zamanda hədəf göstərilir və nüfuzdan salınırlar.
Beynəlxalq media etirazı, İsrailin Qəzzada həyata keçirdiyi hərbi əməliyyatların təkcə mülki insanları deyil, xəbər alma hüququnu da məhv etməyə çalışdığı mesajını verməyi hədəfləyir.
