BAKI, AzerVoice, Nailə Babazadə
İsrail ordusunun 7 oktyabr 2023-cü ildən bəri Qəzza zolağına həyata keçirdiyi hücumlarda həyatını itirənlərin sayı son 24 saatda 76 nəfər artaraq 63 min 633-ə çatıb.
AzerVoice xəbər verir ki,Qəzzədəki Səhiyyə Nazirliyinin yazılı açıqlamasında, İsrailin davam edən hücumlarında baş verən can itkiləri və yaralanmalara dair son məlumatlar paylaşılıb.
Son 24 saat ərzində Qəzza zolağındakı xəstəxanalara 76 meyit və 281 yaralının gətirildiyi bildirilib.
İsrail ordusunun Qəzzədə 19 yanvarda əldə olunan atəşkəsi pozaraq 18 martdan bəri həyata keçirdiyi hücumlarda 11 min 502 fələstinlinin həyatını itirdiyi, 48 min 900 nəfərin yaralandığı qeyd olunub.
Qəzzədə son 24 saatda humanitar yardım üçün gözləyənlərin hədəf alındığı hücumlarda 12 fələstinlinin həyatını itirdiyi, 90 nəfərin yaralandığı açıqlanıb. İsrail-ABŞ yönümlü guya yardım paylanması nöqtələrində fələstinlilərin hədəf alındığı sistemli hücumlarda 27 maydan bəri öldürülənlərin sayının 2 min 306-ya, yaralıların sayının isə 16 min 929-a çatdığı bildirilib.
İsrailin Qəzza zolağına 7 oktyabr 2023-cü ildən bəri həyata keçirdiyi hücumlarda həyatını itirənlərin ümumi sayının 63 min 633-ə, yaralıların sayının isə 160 min 914-ə yüksəldiyi qeyd olunub.
Bundan əlavə, İsrailin sərhəd qapılarını bağlayaraq yardımların girişini məhdudlaşdırması nəticəsində aclığa sürüklənən Qəzzədə son 24 saatda 3-ü uşaq olmaqla 13 fələstinlinin daha aclıqdan həyatını itirdiyi, 7 oktyabrdan bəri aclıq səbəbilə həyatını itirənlərin sayının 130-u uşaq olmaqla 361-ə yüksəldiyi vurğulanıb.
