BAKI, AzerVoice, Nailə Babazadə
Qəzza zolağında İsrailin hücumları və tətbiq etdiyi blokada səbəbindən dərinləşən humanitar fəlakət fonunda, son 24 saatda biri uşaq olmaqla daha 4 fələstinli aclıqdan dünyasını dəyişib.
AzerVoice xəbər verir ki, bu barədə Qəzzadakı Fələstin Səhiyyə Nazirliyi yazılı açıqlama yayıb.
Açıqlamada qeyd olunub ki, son bir sutkada aclıq və qida çatışmazlığı səbəbilə biri uşaq olmaqla 4 nəfər həyatını itirib. Beləliklə, 7 oktyabr 2023-cü ildən bu günə qədər aclıq səbəbilə ölənlərin ümumi sayı 435-ə yüksəlib. Onlardan 147-si uşaqdır.
BMT-nin dəstəklədiyi İnteqrə edilmiş Qida Təhlükəsizliyi Faza Təsnifatı (IPC) tərəfindən 22 avqust tarixində Qəzzada rəsmi olaraq "aclq vəziyyəti" elan edildiyi gündən bəri 157 nəfərin – onlardan 32-si uşaq olmaqla – aclıq və yetersiz qidalanma səbəbilə həyatını itirdiyi bildirilir. IPC xəbərdarlıq edib ki, bu vəziyyət sentyabr ayının sonunadək Deyr əl-Bələh və Xan Yunis şəhərlərinə də yayıla bilər.
İsrailin hərbi hücumları və eyni zamanda humanitar yardımların girişinə qoyduğu sərt məhdudiyyətlər səbəbilə Qəzza zolağı ağır aclıq və humanitar böhran yaşayır. Su, dərman, tibbi ləvazimat və gigiyenik vasitələrə çıxış imkanlarının demək olar ki, tamamilə məhdudlaşdırıldığı bölgədə əsasən uşaqlar olmaqla aclıqdan ölüm halları artır.
Yerli və beynəlxalq təşkilatlar bildirirlər ki, İsrail aclığı və susuzluğu bir silah kimi istifadə edir. Ordunun mülki infrastrukturu məhv etməsi nəticəsində Qəzzanın 88%-i dağıdılıb, əhali isə dəfələrlə məcburi köçkünə çevrilib.
Qəzzada təxminən 2,3 milyon nəfər yaşayır. Onlardan 2 milyonu İsrailin hücumları və məcburi köçürmə əmrləri nəticəsində öz evlərini tərk etməyə məcbur olub. Çoxsaylı ailələr bir neçə dəfə yerindən edilib.
Ən əsas ehtiyac vasitələrindən məhrum halda çadırlarda və ya məktəblərdə sığınacaq tapan insanlar, gigiyenik şəraitin olmaması, sanitariya problemləri və yoluxucu xəstəliklərin yayılması səbəbilə həyat uğrunda mübarizə aparırlar.
İsrail ordusu isə gündəlik hava və quru hücumları ilə bu çadırları və sığınacaq yerlərini bombalamağa davam edir.
