BAKI,AzerVoice
İsrail ABŞ prezidenti Donald Trampın planının birinci mərhələsini qısa müddətdə həyata keçirməyə hazırlaşır. Bu mərhələ əsirlərin azad olunmasını nəzərdə tutur. Bunu İsrailin xarici işlər naziri Gidon Saar bazar günü Haaretz qəzetinə açıqlamasında bildirib.
“Əsir və girovlarımızı geri qaytarmaq üçün əlimizdən gələni edirik. Onları tezliklə evlərinə qayıdanda görməyi səbirsizliklə gözləyirik. İsrail Trampın planının birinci mərhələsinin sürətli icrasına çalışır və bu mərhələnin mahiyyəti vətəndaşlarımızın azad edilməsidir”, - deyə Saar vurğulayıb.
Nazir həmçinin bu istiqamətdə göstərdiyi səylərə görə prezident Trampa təşəkkür edib.
Eyni zamanda, ABŞ prezidenti Donald Tramp bazar günü HƏMAS hərəkatını “tam məhv edilmə” ilə hədələyib. O, CNN telekanalına müsahibəsində HƏMAS-ın hakimiyyətdən və Qəzza üzərindəki nəzarətdən imtina etmədiyi təqdirdə “tam məhvlə üzləşəcəyini” bəyan edib.
Trampdan respublikaçı senator Lindsi Qrehemin onun 20 maddəlik atəşkəs planına HƏMAS-ın cavabını “faktiki rədd cavabı” kimi dəyərləndirməsinə münasibəti soruşulanda, o, belə cavab verib:“Görəcəyik. Zaman göstərəcək.”
ABŞ prezidenti əlavə edib ki, HƏMAS-ın sülhə nail olmaqda ciddi olub-olmadığı “yaxın vaxtlarda bəlli olacaq”. O, planının reallığa çevriləcəyinə ümid etdiyini vurğulayaraq, “bunun üçün qətiyyətlə çalışdığını” bildirib.
