BAKI,AzerVoice, Nailə Babazadə
ABŞ Milli Kəşfiyyat Direktoru Tulsı Qabbard bildirib ki, Qəzza sektorunda atəşkəsin müşahidəsi çətin və daha çox ünsiyyət, koordinasiya və şəffaflıq tələb edən işdir.
AzerVoice xəbər verir ki, Qabbard verdiyi açıqlamada və ABŞ-ın idarə etdiyi Hərbi-Vətəndaş Koordinasiya Mərkəzinə gözlənilməz səfəri zamanı “illərdir görünməyən dərəcədə, yalnız İsraildə deyil, bütövlükdə Yaxın Şərqdə real ümid hissi olduğunu” deyib.
O, bu mərkəzi “müştərək maraqlar naminə ölkələrin birləşməsinin nə gətirə biləcəyinin canlı nümunəsi” adlandırıb və bunun gələcək nəsillər üçün dayanıqlı sülh imkanını yarada biləcəyini söyləyib.
Qabbardın səfəri ABŞ qüvvələrinin Qəzza üzrə atəşkəs razılaşmasının ikinci mərhələsini planlaşdırdığı və həyata keçirdiyi dövrə təsadüf edib.
Eyni vaxtda İsrail baş naziri Benyamin Netanyahunun Rafah tunellərində “sarı xətt” ərazisində ilişib qalmış təxminən 200 HƏMAS döyüşçüsünün Qəzzadan çıxarılmasına ilkin razılıq verməsi hökumət daxilində və müxalifətdə kəskin etirazlara səbəb olub. Maliyyə naziri Betsalel Smotriç qərarı “təhlükəsizlik baxımından səhv” adlandırıb.
ABŞ, Misir və Qətər vasitəçiləri Netanyahunu geri çəkilməməyə çağırır, onların fikrincə HƏMAS döyüşçülərinin təhlükəsiz azad edilməsi Tramp administrasiyasının planının ilk mərhələsinin uğurlu tamamlanması və ikinci mərhələyə keçid üçün əhəmiyyətli addımdır. Lakin Tel-Əvivdə yaranmış qəzəb fonunda hökumət mənbələri vasitəçilərin tələbinə razılıq verildiyi barədə məlumatı təkzib ediblər.
Hərbi dairələrdən verilən şərhlərə görə, Baş Qərargah rəisi Eyal Zamir “mövqeyi qəti və aydındır: bu terrorçuların hamısı məhv edilməlidir”. Rəsmi Kan-11 televiziya kanalı əvvəllər yayıb ki, Netanyahu razılıq verərsə, tunellərdə ilişmiş HƏMAS üzvlərinə silahsız halda Qəzzaya qayıtmağa icazə verilə bilər.
