BAKI, AzerVoice, Nailə Babazadə
İsrail ordusu işğal altındakı Fələstinin İordan çayının qərb sahilinin şimalında fələstinliləri evlərini tərk etməyə məcbur edərək bölgəyə əlavə hərbi qüvvələr göndərib.
AzerVoice xəbər verir ki, yerli mənbələrin məlumatına görə, İsrail əsgərləri Cenin qaçqın düşərgəsinə bitişik Cabiriyyat məhəlləsinin sakinlərini evlərini boşaltmağa məcbur edib və daha sonra məhəllədə genişmiqyaslı axtarışlara başlayıb. Bildirilir ki, əraziyə əlavə hərbi bölmələr də yerləşdirilib.
Son günlərdə İsrail qüvvələri Cenin və onun ətrafındakı yaşayış məntəqələrinə ardıcıl basqınlar edir. Bu basqınlar zamanı fələstinlilər evlərini tərk etməyə məcbur edilir, çox sayda insan saxlanılır və bölgələrdə axtarışlar aparılır.
İsrailin 2023-cü ilin oktyabrında Qəzza zolağına hücuma başlamasından sonra işğal altındakı İordan çayının qərb sahəsi və Şərqi Qüdsdə də fələstinlilərə qarşı basqınlar, saxlanılmalar və hücumların sayı əhəmiyyətli dərəcədə artıb.
Məlumata görə, İsrail ordusu və fələstin torpaqlarını zəbt edən israililərin 2023-cü ilin oktyabrından bəri davam edən hücumları nəticəsində İordan çayının qərb sahəsində 1085 fələstinli öldürülüb, 11 min nəfər yaralanıb və 21 mindən çox insan saxlanılıb.
