BAKI, AzerVoice, Nailə Babazadə
İsrail ordusu, işğal altında olan Şərqi Qüdsdə Birləşmiş Millətlər Təşkilatının (BMT) Yaxın Şərqdəki Fələstinli Qaçqınlara Yardım və İnkişaf Agentliyi (UNRWA) mərkəzinə hücum edib. Hücumun, BMT qurumlarının toxunulmazlıq hüquqlarının açıq pozulması olduğu bildirilib.
AzerVoice xəbər verir ki, UNRWA-dan verilən açıqlamada, səhər saatlarında İsrail polisinin forklift və digər texnika ilə mərkəzə gəldiyi, çox sayda polis tərəfindən həyata keçirilən əməliyyat zamanı BMT işçilərinin mərkəzdə olmadığı bildirilib. Hücum zamanı ərazinin tamamilə bağlandığı, mərkəzdəki işçilərlə əlaqənin kəsildiyi qeyd olunub.
Açıqlamada, İsrailin 1946-cı il BMT Ayrıcalıqları və Toxunulmazlıqları Sazişinə tərəf olduğu, BMT obyektlərinin toxunulmaz olduğu və axtarış və müsadirədən azad olduğu vurğulanıb. Hücumun, UNRWA-nın Şərqi Qüdsdə fəaliyyətlərini məhdudlaşdırmaq qərarından sonra baş verdiyi bildirilib. Bu addımın beynəlxalq hüquq baxımından BMT otoritesinə və Fələstin xalqına ciddi təhdid olduğu qeyd olunub.
Qeyd edək ki, 1950-ci ildən fəaliyyət göstərən UNRWA təxminən 6 milyon fələstinli qaçqına qida, səhiyyə, təhsil və sığınacaq dəstəyi göstərir. Təşkilat son 75 il ərzində İsrail tərəfindən bir neçə dəfə hədəf alınıb, yardımların bir hissəsi məhv edilib. İsrail rəhbərliyi 2023-cü ilin oktyabrında Qəzza Zolağına hücumlar zamanı UNRWA-ya qarşı qaralama kampaniyası aparıb və bəzi işçilərin hücumlara qatıldığı iddiası ilə agentliyin fəaliyyətinin dayandırılmasını tələb edib.
UNRWA-nın fəaliyyətini məhdudlaşdırmaq məqsədli iki qanun layihəsi 28 oktyabrda İsrail parlamentindən keçib. Tel-Əviv hökumətinin Şərqi Qüdsdəki fəaliyyətləri dayandırmaq qərarı 1 fevralda qüvvəyə minib. Hücum, BMT Baş Assambleyasının UNRWA-nın fəaliyyət müddətini 3 il uzatma qərarından sonra baş verib.
