BAKI,AzerVoice, Nailə Babazadə
Livanın xarici işlər naziri Yusuf Rəcci İsrailin Livana qarşı genişmiqyaslı hücumlara hazırlaşdığına dair ərəb və beynəlxalq tərəflərdən xəbərdarlıqlar aldıqlarını bildirib.
AzerVoice xəbər verir ki, nazir Rəcci Qətər mərkəzli “Al Jazeera” ərəb televiziya kanalına gündəmlə bağlı açıqlamalar verib.
Rəcci atəşkəsə baxmayaraq İsrailin Livan ərazisinə hücumlarını davam etdirdiyinə diqqət çəkərək, bunun dayandırılması üçün intensiv diplomatik fəaliyyət apardıqlarını qeyd edib.
Atəşkəsə Nəzarət Komitəsi çərçivəsində aparılan danışıqlara paralel olaraq İsrail hücumlarının davam etdiyini vurğulayıb.
“İsrailin Livana qarşı genişmiqyaslı hərbi əməliyyat və intensiv hücum hazırlığında olduğuna dair ərəb və beynəlxalq tərəflərdən xəbərdarlıqlar almışıq.” - deyə Rəcci qeyd edib.
Rəcci bildirib ki, Livan ordusunun ilin sonuna qədər ölkənin cənubunda, Litani çayının cənubunda yerləşən ərazilərə yerləşərək silahların dövlətin inhisarında toplanması ilə bağlı vəzifəni yerinə yetirəcəyinə inanırlar. O, Təl-Əvivlə aparılan danışıqların məqsədinin İsrail hücumlarının dayandırılması və işğal etdiyi ərazilərdən geri çəkilməsi olduğunu qeyd edib.
“Bu mərhələdə İsraillə sülh sazişindən uzağıq.” - deyə Rəcci vurğulayıb.
Silahların dövlətin nəzarətində toplanması məsələsinə toxunan Rəcci, Hizbullahın silahlarının İsrail hücumlarının qarşısını almadığını iddia edib.
“Milli maraqlar naminə dövlət Hizbullahla silahlarını təhvil verməsi üçün dialoq aparır, lakin Hizbullah indiyədək bunu rədd edir. Hizbullah silahlarını təhvil verməlidir.” - deyə o qeyd edib.
Livan Nazirlər Kabineti 5 avqustda silahların dövlətin inhisarında toplanması gündəmi ilə iclas keçirərək, orduya “ilin sonuna qədər silahların toplanması ilə bağlı plan hazırlamaq” tapşırığı vermişdi.
