BAKI, AzerVoice
İsrailin baş naziri Benyamin Netanyahu bazar günü bildirib ki, İsrail İran xalqı ilə “həmrəy mövqedədir”. Onun sözlərinə görə, son günlər İranın bir sıra şəhərlərini əhatə edən etirazlar fonunda baş verən proseslər diqqətlə izlənilir. AzerVoice xəbər verir ki, hökumətin həftəlik iclasının əvvəlində çıxış edən Netanyahu: “Biz İran xalqının azadlıq, ləyaqət və ədalət uğrunda mübarizəsi ilə həmrəyik”-deyə bildirib.
Baş nazirin ofisinin yaydığı bəyanata əsasən, Netanyahu “çox güman ki, İran xalqının taleyini öz əlinə aldığı bir anın astanasında olduğumuzu” vurğulayıb.
Netanyahu əlavə edib ki, İranda baş verənlər “sürətli və dramatik” xarakter daşıyır və bu hadisələr “iranlıların taleyini öz əllərinə aldıqları həlledici məqam” ola bilər. Məlumat üçün bildirək ki, i, İranda etirazlar ötən bazar günü mağaza sahiblərinin iqtisadi vəziyyətə etiraz olaraq iş dayandırması ilə başlayıb. Sonradan aksiyalar genişlənərək daha çox şəhəri əhatə edib və iştirakçıların irəli sürdüyü tələblər siyasi məzmun alıb.
Xatırladılır ki, İran və İsrail ötən il 12 gün davam edən silahlı qarşıdurma yaşayıb. İsrail İranın nüvə obyektləri və yaşayış məntəqələrinə zərbələr endirdiyini, bunun Tehranın nüvə tədqiqatları və ballistik raket imkanlarını zəiflətmək məqsədi daşıdığını bildirmişdi. İran isə cavab olaraq pilotsuz uçuş aparatları və raketlərlə İsrailə hücumlar həyata keçirmişdi. Daha sonra ABŞ qısa müddətlik olaraq İsraillə birgə İranın nüvə obyektlərini hədəfə alıb və ardınca atəşkəs elan olunub.
Netanyahu bazar günü həmçinin İranın nüvə proqramı məsələsinə toxunaraq, bu mövzunu ABŞ prezidenti Donald Trampla rəsmi səfəri zamanı müzakirə etdiyini deyib. Onun sözlərinə görə, tərəflər “sıfır zənginləşdirmə” prinsipini, eləcə də İranda 60 faiz zənginləşdirilmiş 400 kiloqram nüvə materialının ölkədən çıxarılmasını və obyektlərin ciddi beynəlxalq nəzarətə götürülməsini bir daha təsdiqləyiblər.
Bu arada ABŞ-da yerləşən Human Rights Activists News Agency (HRANA) etirazların İranın 31 vilayətindən 25-də, 170-dən çox yaşayış məntəqəsini əhatə etdiyini bildirib. Məlumata görə, azı 15 nəfər həlak olub, 580-dən çox şəxs saxlanılıb. Agentlik məlumatlarını İranda fəaliyyət göstərən geniş fəal şəbəkəsinə əsaslandırır və əvvəlki etirazlar zamanı dəqiqliyi ilə tanınıb.
