BAKI, AzerVoice, Nailə Babazadə
Suriya Müdafiə Nazirliyi Fərat çayının qərbində qalan YPG işğal altındakı bölgələri hərbi zona elan edərək bütün silahlı qruplaşmaların çayın şərqinə çəkilməsini tələb edib.
AzerVoice xəbər verir ki, Suriya ordusunun yerli mətbuatda dərc olunan rəsmi bəyanatında YPG və PKK terrorçuları ilə yanaşı, bəzi silahlı qrupların Fəratın qərbində qüvvə toplamağa davam etdiyi bildirilib. Məlumata görə, işğal edilən bu bölgələrdən Hələb şəhərinə kamikadze tipli pilotsuz uçuş aparatları (PUA) vasitəsilə hücumlar təşkil edilir. Məhz bu səbəbdən ordu hərbi əməliyyatlara hazırlıq məqsədilə sözügedən əraziləri hərbi zona elan edib.
Ordu rəhbərliyi Meskene və Deyr Hafir kimi strateji məntəqələri əhatə edən xəritə paylaşaraq mülki əhalini terror qruplaşmalarına məxsus nöqtələrdən uzaq durmağa çağırıb. Bəyanatda vurğulanıb ki, Suriya ordusu bu ərazilərin cinayət fəaliyyətləri üçün baza kimi istifadə edilməsinin qarşısını almaq məqsədilə bütün zəruri tədbirləri görəcək.
Xatırladaq ki, yanvarın 7-də Suriya ordusu Hələbdə YPG işğalı altındakı məhəllələrə qarşı genişmiqyaslı əməliyyat keçirmişdi. Nəticədə şəhərin Əşrəfiyyə, Şeyx Maqsud və Bəni Zeyd məhəllələri terrorçulardan təmizlənərək dövlətin nəzarətinə keçib.
