BAKI,AzereVoice
Küveyt rəhbərliyi ölkənin Londondakı hazırkı səfiri Bədr Məhəmməd əl-Əvadinin vətəndaşlığını ləğv edərək diplomatik korpusda nadir görünən bir addım atıb. Bu qərarla rəsmi etimadnaməsi olan bir diplomat, təmsil etdiyi dövlətin vətəndaşlığı olmayan bir şəxs statusuna düşüb.
AzerVoice xəbər verir ki, Küveytin rəsmi qəzeti olan "Al-Kuwait Al-Youm"da dərc edilən Əmir fərmanına əsasən, qərar Daxili işlər naziri Şeyx Fəhd əl-Yusifin rəhbərlik etdiyi Vətəndaşlıq üzrə Ali Təhqiqat Komissiyasının tövsiyəsi ilə qəbul edilib. Maraqlı məqam budur ki, vətəndaşlıqdan məhrumetmə "tabeçilik yolu ilə" (by dependency) baş verib. Belə ki, səfirin atası, keçmiş təhlükəsizlik zabiti Məhəmməd İbrahim əl-Əvadinin (vəfatından sonra) vətəndaşlığı ləğv edildiyi üçün, onun bütün ailə üzvlərinin də vətəndaşlığı avtomatik olaraq qüvvədən düşüb.
Küveyt qanunvericiliyinə (13 və 21-ci maddələr) görə, vətəndaşlığın saxta məlumatlar və ya sənədlər əsasında alındığı sübut olunarsa, bu qərar geriyə ilə tətbiq edilir.
Bu hadisə Küveyt Xarici İşlər Nazirliyini olduqca çətin vəziyyətdə qoyub. Dünyanın ən mühüm diplomatik mərkəzlərindən biri olan Londonda dövləti təmsil edən şəxsin artıq rəsmi vətəndaşlıq bağının olmaması beynəlxalq protokollar baxımından ciddi suallar doğurur.
Qeyd edək ki, Küveyt hökuməti 2024-cü ildən etibarən vətəndaşlıq qeydlərinin yoxlanılması və qanunsuz sənədlərin ləğvi istiqamətində genişmiqyaslı kampaniya başladıb. İndiyədək minlərlə şəxsin, o cümlədən keçmiş deputatların, yüksək rütbəli hərbçilərin və akademiklərin vətəndaşlığı ləğv edilib.
