BAKI,AzerVoice, Nailə Babazadə

İsrail ordusu ABŞ Prezidenti Donald Trampın atəşkəs planının ikinci mərhələsinə uyğun olaraq Qəzza zolağındakı "Sarı xətt" boyunca xüsusi toplama məntəqələri yaradıb.

AzerVoice xəbər verir ki, bu məntəqələr HƏMAS-ın öz silahlarını beynəlxalq sabitləşdirmə qüvvələrinə təhvil verməsi üçün nəzərdə tutulub. Planlaşdırılan prosesə əsasən, toplanan silahlar İsrailə daşınaraq orada məhv edilməlidir.

Lakin İsrail hərbçiləri indiyədək silahların təhvil verilməsi ilə bağlı hər hansı bir əlamətin müşahidə olunmadığını bildiriblər. HƏMAS rəsmiləri isə tərksilah olunmaq və ya silahları təslim etmək barədə razılığa gəldiklərini təkrarən təkzib edirlər. Digər tərəfdən, Qəzzada prosesə nəzarət etməli olan beynəlxalq sabitləşdirmə qüvvələri hələ də bölgəyə yerləşdirilməyib.

İsrail ordusundakı mənbələr Həmasın raket və digər silah istehsalı imkanlarını bərpa etməyə çalışdığını müəyyən ediblər. Kəşfiyyat məlumatlarına görə, qruplaşma atəşkəsdən istifadə edərək tunelləri təmir edir, döyüşçüləri maliyyələşdirir və öz mövqelərini möhkəmləndirir. İsrail ordusunun Baş nazir Benyamin Netanyahuya təqdim etdiyi üç səhifəlik hesabatda Həmasın Qəzzada idarəçiliyini dərinləşdirdiyi və öz üzvlərini dövlət nazirliklərinə, eləcə də təhlükəsizlik aparatlarına inteqrasiya etdiyi qeyd olunur.

Bütün İsrail media qurumlarının yaydığı məlumata görə, ordunun 7-ci zirehli briqadası Qəzzanın cənubunda BMT-nin Yaxın Şərqdəki Fələstinli Qaçqınlara Yardım və İş üzrə Agentliyinin (UNRWA) ədyalları və humanitar yardımları arasında gizlədilmiş böyük miqdarda silah-sursat aşkar edib. Tapılan hərbi ləvazimatlar arasında 110-a yaxın minaatan mərmisi və raketlər yer alıb.

Prezident Donald Tramp HƏMAS-ın tərksilah olacağını iddia etsə də, İsrail təhlükəsizlik rəsmiləri buna şübhə ilə yanaşırlar. Onların fikrincə, HƏMAS idarəçiliyi rəsmən texnokratik hökumətə təhvil versə belə, bölgədə on minlərlə silahlı üzvünü və kadrlarını qoruyub saxlayacaq. İsrail ordusu HƏMAS-ın öz xoşu ilə silahı yerə qoymayacağına inanır və qruplaşmanı tərksilah etmək üçün yenidən hərbi əməliyyatlara başlamağın qaçılmaz ola biləcəyini proqnozlaşdırır.