BAKI, VOA, Nailə Babazadə
İsrail ordusunun 2023-cü ilin oktyabr ayından bəri Qəzza zolağına təşkil etdiyi hücumlarda həyatını itirənlərin sayı 72 min 70-ə çatıb.
VOA xəbər verir ki, İsrail ordusu, atəşkəsə baxmayaraq Qəzza zolağına hücumlarını davam etdirir. Qəzzadakı Səhiyyə Nazirliyindən edilən yazılı açıqlamada, İsrailin 2023-cü ilin oktyabrından bəri davam edən hücumlarında yaşanan can itkiləri ilə bağlı son məlumatlar paylaşılıb. Qeyd olunub ki, son 48 saat ərzində Qəzzadakı xəstəxanalara bir nəfərin cənazəsi və 10 yaralı gətirilib.
Məlumatda bildirilir ki, Qəzzada atəşkəsin qüvvəyə mindiyi 10 oktyabr 2025-ci il tarixindən bəri İsrailin hücumlarında 612 nəfər öldürülüb, 1640 nəfər yaralanıb, dağıntılar altından isə 726 cənazə çıxarılıb. İsrailin 2023-cü ilin oktyabrında Qəzza zolağında başladığı hücumlarda ümumi can itkisinin 72 min 70-ə, yaralı sayının isə 171 min 738-ə yüksəldiyi bildirilib.
Həmçinin Qəzza zolağında dağıntılar altında hələ də minlərlə cənazənin olduğu qeyd edilir.
