BAKI, VOA
Livanın Baş naziri Nəvaf Salam bu gün (bazar ertəsi) verdiyi bəyanatda hökumətin "Hizbullah"dan silahlarını təhvil verməyi və fəaliyyətini yalnız siyasi sahə ilə məhdudlaşdırmağı tələb etdiyini bildirib.
VOA xəbər verir ki, Salam Beyrutda keçirilən Nazirlər Şurasının iclasından sonra çıxış edərək deyib: "Biz Livan ərazisindən raketlərin atılmasını pisləyirik. Bu, "Hizbullah"ın fəaliyyətinin qadağan edilməsini, onun silahlarını təhvil verməyə məcbur edilməsini və yalnız siyasi fəaliyyətə sadiqliyini tələb edir".
Baş nazir əlavə edib: "Dövlət öz ərazisindən başlanan hər hansı hərbi əməliyyatı qəti şəkildə rədd etdiyini bəyan edir və təsdiqləyir ki, müharibə və sülh qərarı yalnız dövlətin əlindədir. Bu, "Hizbullah"ın fəaliyyətinin qadağan edilməsini və onun silahlarını təhvil verməyə, siyasi fəaliyyətlə kifayətlənməyə məcbur edilməsini zəruri edir. Hökumət təhlükəsizlik orqanlarından hər hansı hərbi əməliyyatın qarşısını almaq və icraçıları həbs etmək üçün qeyd olunanları icra etməyi xahiş edib. Həmçinin ordu rəhbərliyinə Litani çayından şimalda silahların toplanması ilə bağlı planın icrasına başlamaq göstərişi verilib".
İsrail bu səhər Livanın müxtəlif bölgələrinə hava zərbələri endirib. Səhiyyə Nazirliyinin ilkin məlumatına görə, hücumlar nəticəsində 31 nəfər ölüb, 149 nəfər yaralanıb.
Eskalasiya fonunda İsrailin Baş Qərargah rəisi general Eyal Zamir bu gün "Hizbullah" ilə "çoxgünlük döyüşlərin" gözlənildiyini bildirib. Zamir İsrail ordusunun yayımladığı video müraciətdə deyib: "Biz "Hizbullah"a qarşı hücum əməliyyatına başlamışıq". O vurğulayıb ki, ordu "yalnız müdafiə xətlərində deyil, həm də hücuma keçir" və əlavə edib: "Çoxgünlük döyüşlərə hazırlaşmaq lazımdır".
İsrail ordusu bu səhər bildirib ki, "Hizbullah"ın İsrail dövləti istiqamətinə atdığı mərmilərə cavab olaraq Beyrutda və Livanın cənubunda qruplaşmanın yüksək rütbəli rəsmilərini hədəf alıb. İsrail qüvvələri "Hizbullah terror təşkilatına məxsus hədəfləri Livanın hər yerində vurmağa başlayıb". İran tərəfindən dəstəklənən qruplaşma isə yaydığı bəyanatda deyib: "Livanı və xalqını müdafiə etmək, həmçinin İsrailin təkrarlanan təcavüzlərinə cavab vermək çərçivəsində İslam Müqaviməti işğal olunmuş Hayfa şəhərinin cənubundakı düşmən İsrail ordusuna məxsus "Mişmar əl-Karmel" raketdən müdafiə obyektini xüsusi raketlər və dron qrupları ilə hədəf alıb".
Bu, 2024-cü ilin noyabrında əldə edilmiş və tərəflər arasında bir ildən çox davam edən düşmənçiliyə son qoyan atəşkəsdən sonra "Hizbullah"ın İsrailə qarşı ilk hücumudur.
