BAKI, VOA, Nailə Babazadə
Ərəb Dövlətləri Liqası (ƏDL) İranın ərəb ölkələrinə qarşı həyata keçirdiyi "açıq hücumları" müzakirə etmək məqsədilə bazar günü nazirlər səviyyəsində fövqəladə iclas keçirəcək.
VOA xəbər verir ki, Səudiyyə Ərəbistanı Xəbər Agentliyinin (SPA) yaydığı məlumata görə, iclas videokonfrans formatında baş tutacaq.
Rəsmi Ər-Riyad və digər üzv dövlətlər bəyan ediblər ki, İranın son raket və PUA zərbələri beynəlxalq hüququn, mövcud nizamnamələrin və mehriban qonşuluq prinsiplərinin kobud şəkildə pozulmasıdır. İclasda bu hücumların qarşısının alınması və regional təhlükəsizliyin qorunması üçün kollektiv addımların atılması planlaşdırılır.
Fövqəladə iclasın keçirilməsi üçün yeddi dövlət birgə müraciət edib. Bu ölkələr sırasına Səudiyyə Ərəbistanı, İordaniya, Bəhreyn, Oman, Qətər, Küveyt və Misir daxildir.
Xatırladaq ki, fevralın 28-dən bəri davam edən İran–İsrail–ABŞ münaqişəsi çərçivəsində bir çox Körfəz ölkələri və İordaniya İran tərəfindən hədəf alınıb. İclasda həmçinin dəniz və hava yollarının təhlükəsizliyi, eləcə də qlobal enerji bazarlarına təhdidlər əsas müzakirə mövzusu olacaq.
