BAKI,VOA, Fərid Mikayılov
Səudiyyə Ərəbistanı, Birləşmiş Ərəb Əmirlikləri və Bəhreyn İran tərəfindən pilotsuz uçuş aparatları və ballistik raketlərlə həyata keçirildiyi bildirilən hücumların hava hücumundan müdafiə sistemləri tərəfindən zərərsizləşdirildiyini açıqlayıb.
VOA xəbər verir ki, Səudiyyə Ərəbistanının Müdafiə Nazirliyi ölkənin müxtəlif bölgələrinə yönələn bir sıra hücumların qarşısının alındığını bildirib.
Məlumata görə, Prins Sultan Hərbi Hava Bazasına doğru buraxılan 6 ballistik raket hava hücumundan müdafiə sistemləri tərəfindən havada məhv edilib.
Nazirliyin açıqlamasında həmçinin ölkənin şərqində 1 ballistik raketin və 8 pilotsuz uçuş aparatının, Həfər əl-Batin vilayətində isə 2 pilotsuz uçuş aparatının vurulduğu qeyd olunub.
Bundan başqa, Əl-Hərəc vilayətinin şərqində həyata keçirilən hücum zamanı 5 pilotsuz uçuş aparatı, ölkənin cənub-şərqində yerləşən Şeybə neft yatağı istiqamətində hərəkət edən 7 pilotsuz uçuş aparatı da hava müdafiə sistemləri tərəfindən zərərsizləşdirilib.
BƏƏ və Bəhreyn də hücumların qarşısını aldı
Birləşmiş Ərəb Əmirliklərinin Müdafiə Nazirliyi İran ərazisindən ölkəyə doğru buraxılan ballistik raketlərə qarşı hava müdafiə sistemlərinin işə düşdüyünü açıqlayıb.
Nazirlik ölkə ərazisinin və vətəndaşların təhlükəsizliyini təmin etmək üçün bütün təhlükələrə qarşı hazır olduqlarını vurğulayıb.
Bəhreynin Daxili İşlər Nazirliyi isə hücum təhlükəsi səbəbindən ölkədə hava hücumu siqnallarının səsləndiyini bildirib və vətəndaşlara sakit qalaraq ən yaxın təhlükəsiz sığınacaqlara getmək çağırışı edib.
