BAKI, VOA, Nailə Babazadə
Artıq iki həftədir ki, İranın Körfəz ölkələrindəki yaşayış məntəqələrini, mülki obyektləri və kritik infrastrukturu hədəf alan raket və pilotsuz uçuş aparatı (PUA) hücumları davam edir.
VOA xəbər verir ki, Cümə günü Körfəz Əməkdaşlıq Şurası (KƏŞ) və bölgə dövlətləri bu hücumların təkcə regional təhlükəsizliyi deyil, həm də qlobal iqtisadiyyat və enerji bazarlarının sabitliyini təhdid etdiyini bəyan ediblər.
Səudiyyə Ərəbistanı: Bir gündə 60-dan çox PUA məhv edilib
Səudiyyə Ərəbistanı Müdafiə Nazirliyinin rəsmi sözçüsü türki əl-Maliki bildirib ki, cümə günü səhər saatlarından axşam saatlarına qədər ölkənin hava hücumundan müdafiə sistemləri 62 PUA-nı zərərsizləşdirib. Hücumların coğrafiyası geniş olub; Şərq vilayəti, Mərkəzi bölgə və Riyaddakı Diplomatik məhəllə intensiv hədəfə alınıb.
Birləşmiş Ərəb Əmirlikləri: İtkilər və müdafiə statistikası
BƏƏ Müdafiə Nazirliyi münaqişə başlayandan bəri İran tərəfindən atılan 285 ballistik raketin və 1500-dən çox PUA-nın vurulduğunu açıqlayıb. Təəssüf ki, hücumlar nəticəsində aralarında həm BƏƏ, həm də xarici ölkə (Pakistan, Nepal, Banqladeş) vətəndaşlarının olduğu 6 nəfər həlak olub, 141 nəfər isə yaralanıb. Dubay mərkəzində bir binanın fasadına raket qəlpələri düşsə də, ciddi xəsarət qeydə alınmayıb. Hazırda ölkədə uçuşların mərhələli şəkildə bərpa olunduğu bildirilir.
Oman, Bəhreyn və Küveyt: Mülki obyektlərə zərbələr
Oman: Sohar şəhərindəki sənaye zonasına düşən PUA iki xarici vətəndaşın ölümünə səbəb olub.
Bəhreyn: Müdafiə qüvvələri ölkəni hədəf alan 115 raket və 191 PUA-nı məhv etdiklərini bildirərək mülki əhalini sığınacaqlarda qalmağa çağırıb.
Küveyt: Ölkə daxilində raket qəlpələri ilə bağlı yüzlərlə müraciət araşdırılır. Ərzaq təhlükəsizliyini qorumaq üçün xaricdən təyyarələrlə qida tədarükünə başlanılıb.
Qlobal Təhlükə Xəbərdarlığı
KƏŞ-in Baş katibi Casem Albudaivi İranın Hörmüz boğazında naviqasiya azadlığını və ticarət gəmilərini hədəf almasını beynəlxalq hüququn kobud pozuntusu adlandırıb. O vurğulayıb ki, bu təhdidlər qlobal enerji təhlükəsizliyi üçün ciddi risklər yaradır və beynəlxalq ictimaiyyətin dərhal müdaxiləsini tələb edir.
Qətər isə daxili vəziyyətin sabit olduğunu, ətraf mühitin monitorinqi nəticəsində heç bir çirklənmənin qeydə alınmadığını bəyan edib. Bölgə dövlətləri öz suverenliklərini qorumaq üçün hər cür qətiyyətli addım atacaqlarını vurğulayırlar.
