BAKI, VOA, Nailə Babazadə

İraqın neft naziri Heyan Əbdülqəni Bağdadın bəzi neft tankerlərinin Hörmüz boğazından keçməsinə icazə verilməsi barədə İranla danışıqlar apardığını açıqlayıb.

VOA xəbər verir ki, rəsmi xəbər agentliyinin çərşənbə axşamı yaydığı məlumata görə, bu addım İraqın öz sularında tankerlərə edilən son hücumlardan sonra xam neft ixracında yaranan fasilələri aradan qaldırmaq məqsədi daşıyır.

Nazir bazar ertəsi yaydığı video-açıqlamasında İraqın həmçinin neftin Kürdüstan bölgəsindən keçmədən birbaşa Türkiyənin Ceyhan limanına vurulmasını təmin edəcək köhnə boru kəmərinin bərpası üzərində işlədiyini bildirib. O, Kərkükdən birbaşa ixracı bərpa etmək üçün kəmərin 100 kilometrlik hissəsində təftiş işlərinin bir həftə ərzində tamamlanacağını qeyd edib. On ildən artıqdır ki, fəaliyyəti dayandırılmış Kərkük-Ceyhan boru kəmərinin yenidən açılması Yaxın Şərqdəki münaqişə səbəbindən Hörmüz boğazında gəmiçiliyin ciddi şəkildə pozulduğu bir vaxtda strateji ixrac alternativi hesab olunur.

Bir vaxtlar qlobal neft tədarükünün 0,5 faizini qarşılayan 960 kilometrlik bu kəmər vasitəsilə ixrac 2014-cü ildə İŞİD yaraqlılarının təkrarlanan hücumlarından sonra dayandırılmışdı. Neft Nazirliyi bu marşrutla ixracın ilkin mərhələdə gündəlik 250 min barel ola biləcəyini, Kürdüstan bölgəsindəki yataqlar da daxil edilərsə bu rəqəmin 450 min barelə qədər yüksələcəyini proqnozlaşdırır. Bağdad Kürdüstan boru kəmərindən müvəqqəti marşrut kimi istifadə etməyə çalışsa da, regional hökumətin ixtiyari şərtlər irəli sürdüyünü iddia edərək ixracın qarşısı alınacağı təqdirdə hüquqi addımlar atılacağı barədə xəbərdarlıq edib. Kürd rəsmiləri isə ittihamları rədd edərək ixraca mane olmadıqlarını və Bağdadın regionun neft sektorundakı təhlükəsizlik və iqtisadi problemləri həll etmədiyini bildiriblər.