BAKI, VOA, Nailə Babazadə
İsrail ordusu çərşənbə axşamı günü verdiyi rəsmi bəyanatda Cənubi Livanda İran tərəfindən dəstəklənən "Hizbullah" qruplaşması ilə gedən döyüşlərdə dörd əsgərinin həlak olduğunu təsdiqləyib.
VOA xəbər verir ki, hərbi mənbələrin məlumatına görə, eyni taborun üzvü olan üç hərbçi döyüş meydanında həyatını itirib, digər bir əsgərin isə eyni hadisə zamanı öldüyü, lakin adının hələlik ictimaiyyətə açıqlanmadığı bildirilir. Toqquşmalar zamanı daha iki İsrail hərbçisi müxtəlif dərəcəli xəsarətlər alıb. İsrail rəsmiləri bu hərbi kampaniyanın "Hizbullah"ın sərhəd bölgəsindən tamamilə təmizlənməsinə qədər davam edəcəyini və prosesin uzunmüddətli işğala çevrilə biləcəyini istisna etmirlər.
Bölgədəki gərginlik BMT sülhməramlı qüvvələrindən (UNIFIL) də yan keçməyib. Son iki gündə baş verən ayrı-ayrı insidentlər nəticəsində İndoneziyadan olan üç sülhməramlı həlak olub. UNIFIL-in bəyanatına görə, bazar ertəsi günü Bani Hayyan yaxınlığında mənşəyi məlum olmayan partlayış nəticəsində sülhməramlıların nəqliyyat vasitəsi məhv edilib və iki əsgər həyatını itirib. Bazar günündən bazar ertəsinə keçən gecə isə Adçit əl-Quseyr kəndi yaxınlığındakı mövqelərin yaxınlığında mərminin partlaması daha bir İndoneziya vətəndaşının ölümü ilə nəticələnib. Bu, martın 2-də İsrail və "Hizbullah" arasında başlayan yeni müharibə dövründə BMT qüvvələrinin verdiyi ilk rəsmi itkilərdir.
Livan hakimiyyətinin son hesabatlarına görə, İsrailin ölkə ərazisinə endirdiyi hava və quru zərbələri nəticəsində ölənlərin sayı 1240 nəfəri ötüb. Qurbanlar arasında 120-dən çox uşaq, təxminən 80 qadın və onlarla tibb işçisi var. Xüsusilə son həftəsonu Livanlı jurnalistlərin və feldşerlərin hədəf alınması humanitar böhranın miqyasını daha da genişləndirib. Xatırladaq ki, Livan bu münaqişəyə martın 4-də — İsrail və ABŞ-ın İrana hücumundan iki gün sonra, "Hizbullah"ın Tehranla həmrəylik nümayiş etdirərək İsrailə raket zərbələri endirməsi ilə cəlb olunub. Bu addım İsrailin genişmiqyaslı əks-hücumuna yol açıb.
