BAKI, VOA, Nailə Babazadə
Suriya-Livan sərhədinin kələ-kötür relyefində sarı buldozerlər zirehli texnikalar üçün torpaq bəndlər ucaldır, əsgərlər isə "Hizbullah" tərəfindən istifadə edildiyi bildirilən tunellərdə axtarış aparır.
VOA xəbər verir ki, Suriya Müdafiə Nazirliyinin xüsusi icazəsi ilə bölgəyə daxil olan AFP müxbiri bir aydır davam edən hərbi möhkəmlənməni ilk dəfə lentə alıb. Suriya sərhəd keçid məntəqələrinin rəsmisi Məhəmməd Hammud bildirib ki, aparılan təmizləmə əməliyyatları nəticəsində iki ölkəni birləşdirən, silah və narkotik qaçaqmalçılığı üçün istifadə olunan geniş tunel şəbəkəsi aşkar edilib.
Qüseyr bölgəsindəki bəzi tunellərin girişi yaşayış evlərinin zirzəmisində qazılıb və bu keçidlər elektrik naqilləri, habelə ventilyasiya sistemləri ilə təchiz olunub. Bir evin divarında "Hizbullah"ın mərhum lideri Həsən Nəsrullah və iranlı general Qasım Süleymaninin fotoları aşkar edilib. 2024-cü ilin dekabrında Əhməd əş-Şaraanın rəhbərlik etdiyi ittifaq tərəfindən Bəşər Əsəd devrildikdən sonra "Hizbullah"ın Suriyadan gələn təchizat xətləri kəsilib. Dəməşqin yeni rəhbərliyi hazırda qaçaqmalçılıqla mübarizə üçün Beyrutla koordinasiyalı hərəkət etdiyini bəyan edir.
İsrail ordusu "Hizbullah"a hərbi ləvazimatların çatdırılmasının qarşısını almaq üçün sərhəd keçidlərinə dəfələrlə zərbələr endirib. AFP müxbiri bəzi tunellərin yaxınlığında İsrail bombardmanı nəticəsində dağılmış binaları müşahidə edib. Suriya rəsmiləri martın 4-də sərhədə zirehli texnika, raket qurğuları və kəşfiyyat batalyonlarının yerləşdirildiyini elan edərək, məqsədin "regional müharibənin eskalasiyası fonunda sərhədə nəzarəti təmin etmək" olduğunu bildiriblər. Diplomatik mənbələr Dəməşqin "Hizbullah" təhlükəsinə son qoymaq üçün Livana hərbi müdaxilə etmək təzyiqlərinə müqavimət göstərdiyini qeyd edirlər.
Suriya hərbi mənbələri ordunun hər hansı hərbi əməliyyat niyyətində olmadığını, missiyanın yalnız sərhəd nəzarəti ilə məhdudlaşdığını vurğulayıblar. Prezident Əhməd əş-Şaraa Britaniyaya səfəri çərçivəsində "Chatham House" beyin mərkəzindəki çıxışında ölkəsinin münaqişədən kənarda qalmaq istədiyini bir daha təsdiqləyib: "Suriyada 14 illik müharibə kifayətdir. Biz çox ağır bədəl ödəmişik və yeni bir təcrübə yaşamağa hazır deyilik". Dəməşq bəyan edib ki, birbaşa hədəf alınmadıqca, Suriya bu münaqişənin tərəfi olmayacaq.
