BAKI,VOA, Nailə Babazadə
İran İslam İnqilabı Keşikçiləri Korpusu (SEPAH) Birləşmiş Ərəb Əmirliklərində (BƏƏ) amerikalı uçuş mühəndisləri və döyüş pilotlarının toplandığı "gizli nöqtənin" ballistik raketlərlə hədəf alındığını iddia edib.
VOA xəbər verir ki, korpusun yaydığı rəsmi bəyanatda bildirilir ki, BƏƏ-dəki bazalardan kənarda yerləşən və ABŞ hərbi personalı üçün gizli görüş yeri kimi istifadə edilən obyekt ballistik raketlərlə dəqiqliklə vurulub. Bu iddia regionda ABŞ-İsrail və İran arasındakı hərbi qarşıdurmanın yeni və daha təhlükəli mərhələyə keçdiyini göstərir.
SEPAH-ın bəyanatında həmçinin qeyd olunur ki, ərazidən alınan kəşfiyyat məlumatları və müşahidə edilən intensiv təcili yardım maşınlarının hərəkəti hücum nəticəsində çox sayda ölü və yaralının olduğuna işarə edir. Tehran tərəfi bu əməliyyatı ABŞ-ın regiondakı hərbi infrastrukturuna və personalına endirilən ağır zərbə kimi qələmə verir. Lakin hələlik nə BƏƏ rəsmiləri, nə də ABŞ-ın Yaxın Şərqdəki Mərkəzi Komandanlığı (CENTCOM) bu iddiaya münasibət bildirib və ya itkilər barədə rəsmi məlumat yaymayıb.
Xatırladaq ki, fevralın 28-dən başlayan "Epic Fury" əməliyyatı fonunda İran mütəmadi olaraq ABŞ bazalarının yerləşdiyi Körfəz ölkələrini hədəf alır. BƏƏ hava hücumundan müdafiə qüvvələri indiyədək minlərlə raket və dronu zərərsizləşdirsə də, İran tərəfi vaxtaşırı olaraq "strateji hədəflərin vurulduğu" barədə bəyanatlar yayır. Ekspertlər hesab edirlər ki, pilotların və mühəndislərin hədəf alınması iddiaları regionda psixoloji müharibənin tərkib hissəsi ola bilər və ya gərginliyi quru əməliyyatları səviyyəsinə qaldıra biləcək bir qıcıqlandırıcı rolunu oynaya bilər.
