BAKI,VOA, Nailə Babazadə

İsrail ordusu, atəşkəs rejiminə rəğmən Livanın cənubunda işğal etdiyi ərazilərdən kənarda yerləşən Deyr Amis qəsəbəsinə hava zərbələri endirib.İsrail ordusunun Livanda 17 aprel tarixində qüvvəyə minən atəşkəsə baxmayaraq, ölkə ərazisindəki hücumları davam edir.

VOA xəbər verir ki, Livanın rəsmi agentliyi olan NNA-nın məlumatına görə, İsrail ordusu Livanın cənubundakı Sur şəhərinə bağlı Deyr Amis qəsəbəsini hava hücumu ilə hədəf alıb.

İsrail ordusu daha əvvəl Livanın cənubunda işğal etdiyi sahələrin xaricində qalan Deyr Amis qəsəbəsinə hücum edəcəyi ilə bağlı hədə-qorxu gəlmişdi.

İsrail ordusu martın 2-də Livana intensiv hava hücumlarına başlayaraq ölkənin cənubundakı bir çox qəsəbəni işğal etmişdi. Bu müddət ərzində Livan hökuməti ölkə daxilində didərgin düşən insanların sayının 1 milyon 162 mini keçdiyini açıqlamışdı.

ABŞ Prezidenti Donald Tramp Livan və İsrail arasında 17 apreldə qüvvəyə minən 10 günlük müvəqqəti atəşkəsin daha 3 həftə uzadıldığını bəyan etmişdi.