BAKI,VOA, Nailə Babazadə
Səudiyyə Ərəbistanında qanunsuz miqrasiya və əmək bazarının tənzimlənməsi məqsədilə keçirilən genişmiqyaslı təhlükəsizlik əməliyyatları nəticəsində bir həftə ərzində 12 min 192 nəfər həbs edilib.
VOA xəbər verir ki,Səudiyyə Press Agentliyinin (SPA) şənbə günü yaydığı rəsmi məlumatda bildirilir ki, saxlanılan şəxslər yaşayış (iqamə), əmək qanunvericiliyi və sərhəd təhlükəsizliyi qaydalarını pozmaqda ittiham olunurlar. Statistikaya əsasən, həbs olunanların 6 606 nəfəri yaşayış qaydalarını, 3 min 510 nəfəri sərhədi qanunsuz keçmə cəhdlərini, 2 min 076 nəfəri isə əmək sahəsindəki qayda pozuntularını törədiblər.
Krallığa qanunsuz yollarla girməyə çalışan min 454 nəfər arasında Efiopiya (67%) və Yəmən (32%) vətəndaşları üstünlük təşkil edir. Əməliyyat çərçivəsində təkcə sərhədi keçmək istəyənlər deyil, həm də qanunsuz miqrantlara nəqliyyat və sığınacaq şəraiti yaradan, onları gizlədən 22 vasitəçi də saxlanılıb.
Səudiyyə Ərəbistanı Daxili İşlər Nazirliyi qanunsuz miqrasiya ilə mübarizəni sərtləşdirdiyini bəyan edərək xəbərdarlıq edib ki, bu prosesdə hər hansı formada vasitəçilik edən və ya köməklik göstərən şəxsləri 15 ilədək azadlıqdan məhrumetmə və 1 milyon rial (təxminən 267 000 dollar) məbləğində cərimə gözləyir. Bundan əlavə, həmin şəxslərin nəqliyyat vasitələri və mülkləri də dövlət xeyrinə müsadirə ediləcək. Rəsmilər vətəndaşları və rezidentləri şübhəli hallarla bağlı dərhal müvafiq qaynar xətlər vasitəsilə məlumat verməyə çağırıblar.
