BAKI,VOA, Nailə Babazadə
Livan Prezidenti Cozef Aun bazar ertəsi verdiyi kəskin bəyanatda İsrail ilə aparılan birbaşa danışıqların ölkəni fəlakətdən xilas etmək və münaqişəni bitirmək məqsədi daşıdığını bildirib.
VOA xəbər verir ki, prezident, Livanı müharibəyə sürükləyən qüvvələri — dolayısı ilə "Hizbullah"ı — xarici maraqlara xidmət etməkdə və ölkəyə "xəyanət" etməkdə ittiham edib.
Aun qeyd edib ki, onun əsas hədəfi 1949-cu il barışıq sazişinə bənzər bir razılaşma ilə müharibə vəziyyətinə son qoymaqdır. O, xalqa müraciət edərək, heç bir halda alçaldıcı şərtləri qəbul etməyəcəyini vurğulayıb: "Bizi müharibəyə sürükləyənlər indi danışıqlar masasına oturduğumuza görə bizdən hesab sormağa çalışırlar. Lakin əsl xəyanət xarici maraqlar naminə öz ölkəsini müharibə oduna atanlar tərəfindən törədilir."
Eyni zamanda, "Hizbullah"ın Baş katibi Naim Qasım bu danışıqları "böyük günah" adlandıraraq rəsmi Beyrutun addımlarını qəti şəkildə rədd edib. Qasım bildirib ki, birbaşa danışıqlar Livanı qeyri-sabitlik döngəsinə salacaq və qruplaşma İsrailə qarşı "müdafiə müqavimətini" dayandırmayacaq. "Hizbullah" lideri əlavə edib ki, bu danışıqların nəticələri onlar üçün heç bir hüquqi və ya siyasi qüvvəyə malik deyil.
Qeyd edək ki, ABŞ Prezidenti Donald Trampın vasitəçiliyi ilə 2 martdan bəri davam edən və 2500-dən çox insanın ölümünə səbəb olan müharibədə 17 apreldən etibarən müvəqqəti atəşkəs tətbiq olunub. Atəşkəsə baxmayaraq, İsrail Livanın cənubunda bir çox kəndi əsas ərazidən ayıran strateji "sarı xətt" yaradaraq hərbi əməliyyatlarını və dağıntı işlərini davam etdirir. Livan rəsmiləri isə bu birbaşa danışıqları İsrail qoşunlarının geri çəkilməsi və bir milyondan çox didərgin düşmüş insanın öz evinə qayıtması üçün yeganə çıxış yolu kimi görürlər.
