BAKI,VOA Orxan Qədirzadə
“Microsoft” şirkəti İsrail bölməsinin baş direktoru Alon Haymoviçin vəzifədən uzaqlaşdırıldığını açıqlayıb.
VOA xəbər verir ki, qərar şirkətin qlobal rəhbərliyi tərəfindən aparılan daxili araşdırmadan sonra qəbul olunub. Araşdırma İsrail filialının təhlükəsizlik qurumları ilə əməkdaşlığının xarakteri və texnoloji sistemlərin istifadəsi ilə bağlı şəffaflıq məsələlərini əhatə edib.
İsrailin “Globes” nəşrinin məlumatına görə, “Microsoft”un ABŞ-dən göndərilən audit qrupu bir neçə həftə əvvəl İsrailə gələrək şirkətin xüsusilə təhlükəsizlik strukturları ilə işləyən satış bölməsinin fəaliyyətini yoxlayıb. Araşdırma çərçivəsində dörd ildir İsrail filialına rəhbərlik edən Alon Haymoviç də ifadə verməyə çağırılıb.
Şirkət rəhbərliyinin qiymətləndirməsinə əsasən, bəzi təhlükəsizlik bölmələrinin “Microsoft” sistemlərindən istifadə üsulu tam şəffaf olmayıb və bu vəziyyət Avropadakı hüquqi və tənzimləyici riskləri artırıb. Bu səbəbdən İsrail filialının idarə olunması müvəqqəti olaraq Fransa bölməsinə həvalə edilib.
Məlumata görə, İsrail filialının dövlət strukturları ilə işləyən şöbəsində bir sıra yüksəkvəzifəli rəhbərlər də işdən ayrılıb. Hazırda bölmənin birbaşa idarəetmə strukturu zəifləyib.
Məsələ xüsusilə İsrail Müdafiə Nazirliyi ilə texnoloji müqavilələr kontekstində diqqət çəkir. Bildirilir ki, “Microsoft” İsrailin dövlət bulud sistemi layihəsi olan “Nimbus” proqramının rəsmi tərəfdaşları sırasında yer almasa da, bəzi təhlükəsizlik qurumları şirkətin xidmətlərindən Avropadakı serverlər vasitəsilə istifadə edib.
Şirkət daha əvvəl də oxşar addımlar atmışdı. 2025-ci ilin sentyabrında “Microsoft” İsrail hərbi kəşfiyyatının 8200-cü bölməsi ilə əməkdaşlığı birtərəfli qaydada dayandırmışdı. Buna səbəb “The Guardian” qəzetində yayımlanan və bölmənin fələstinlilər barədə məlumat toplamaq üçün texnoloji vasitələrdən istifadə etdiyini iddia edən araşdırma olmuşdu.
Son aylarda şirkət daxilində və xaricində İsrail təhlükəsizlik strukturları ilə əməkdaşlığa qarşı etirazlar da güclənib. “Microsoft”un Sietldə keçirilən illik proqramçılar konfransında əməkdaşlar və hüquq müdafiəçiləri İsrail təhlükəsizlik qurumları ilə müqavilələrin dayandırılması tələbi ilə aksiyalar keçiriblər.
Ekspertlər hesab edir ki, bu hadisə böyük texnologiya şirkətlərinin geosiyasi və hüquqi risklər qarşısında daha ehtiyatlı davranmağa başladığını göstərir. Xüsusilə Avropada insan hüquqları və məlumat təhlükəsizliyi ilə bağlı təzyiqlərin artması qlobal texnologiya nəhənglərini yeni qərarlar qəbul etməyə məcbur edir.
