BAKI,VOA, Fərid Mikayılov
Birləşmiş Ərəb Əmirliklərinin İran ərazisinə qarşı gizli hərbi əməliyyatlar həyata keçirdiyi iddia olunub.
VOA xəbər verir ki, BƏƏ-nin aprel ayında atəşkəs dövründə İranın Basra körfəzində yerləşən Lavan adasındakı neft emalı zavodunu hədəf aldığı iddia edilir. Bildirilir ki, hücum nəticəsində güclü yanğın baş verib və obyektin istehsal gücünün böyük hissəsi sıradan çıxıb.
Nəşrin məlumatında qeyd olunur ki, həmin vaxt atəşkəs tam qüvvəyə minmədiyi üçün ABŞ administrasiyası hadisəyə reaksiya verməyib. Mənbələrin iddiasına görə, Vaşinqton bölgədə İrana qarşı mövqe sərgiləyən Körfəz ölkələrinin prosesə qoşulmasını müsbət qarşılayıb.
Bildirilib ki, BƏƏ ilə ABŞ arasında hərbi əməkdaşlıq müharibə dövründə də davam edib. Bununla yanaşı, United States Department of Defense və BƏƏ Xarici İşlər Nazirliyi məsələ ilə bağlı rəsmi şərh verməyib.
Qeyd edək ki, İranın Milli Neft Emalı Şirkəti aprelin 8-də Lavan adasında yerləşən neft emalı zavodunda baş verən partlayışın “düşmən hücumu” nəticəsində meydana gəldiyini açıqlamışdı.
