BAKI,VOA Yusif Şərifzadə
Fələstinli Məhbuslar Cəmiyyəti bildirib ki, 2023-cü ilin oktyabrından bəri İordan çayının qərb sahilində 23 mindən çox fələstinli İsrail Müdafiə Qüvvələri tərəfindən saxlanılıb.
VOA xəbər verir ki, təşkilat bu dövrü 1967-ci ildən bəri fələstinli məhbuslar üçün “ən qanlı və ən ağır mərhələ” adlandırır. Saxlanılanlar arasında qadınlar, uşaqlar və yaralı şəxslər də var, Qəzza zolağından 7 oktyabr 2023-cü ildən sonra itkin düşən minlərlə fələstinli statistika daxil edilməyib.
Bəyanatda vurğulanıb ki, “həbs siyasəti İsrailin müstəmləkəçilik layihəsinin əsas sütunlarından biri olub və olmaqda davam edir. Bu, fələstinlilərin mövcudluğunu hədəf alan, sosial və milli strukturu dağıtmağa yönəlmiş sistemli vasitə kimi istifadə olunur.”
Hazırda 9 400-dən çox fələstinli İsrail həbsxanalarında saxlanılır. Təşkilatın məlumatına görə, bu həbsxanalar “işgəncə, aclıq, alçaldılma və tibbi yardımdan sistemli şəkildə məhrumetmə məkanlarına” çevrilib.
Bəyanata əsasən, İsrailin Qəzzaya qarşı müharibəsinin başlanmasından bu yana 89 fələstinli həbsxanada həyatını itirib. Onlardan bəziləri işgəncəyə məruz qalmış və tibbi laqeydlik səbəbindən ölüb.
