BAKI,VOA, Fərid Mikayılov
Səudiyyə Ərəbistanının milli neft-qaz şirkəti Saudi Aramco və Fransanın kvant hesablama şirkəti Pasqal ölkədə ilk kvant kompüterinin işə salındığını açıqlayıb.
VOA xəbər verir ki, Dahrahn şəhərində təqdim edilən kompüter Səudiyyə Ərəbistanının yeni texnologiya və rəqəmsal həllər sahəsində mövqelərini gücləndirmək niyyətini göstərir.
Tədbirdə həmçinin Q.C.aaS adlı, Orta Şərqdə ilk kommersiya kvant hesablama platforması təqdim edilib. Bu platforma müəssisələr və tədqiqat institutları üçün təhlükəsiz bulud interfeysi vasitəsilə resurslara çıxışı təmin edir və enerji, materialşünaslıq və sənaye sektorlarında kvant tətbiqlərinin inkişafını sürətləndirməyə imkan verir.
Saudi Aramco-nun texnologiya və innovasiya üzrə icraçı vitse-prezidenti Əhməd əl-Xuvayter bildirib: “Bu kvant uğuru Səudiyyə araşdırmaçıları, mühəndisləri və alimlərinə məxsusdur. Birgə təlim və tədqiqatlara sərmayə qoymaqla Krallıqda dünya səviyyəli kvant texnologiyaları biliklərini yaradaraq növbəti nəsil enerji həllərinin əsasını qoyuruq.”
Layihə, Səudiyyə Ərəbistanının iqtisadiyyatın diversifikasiyası və “Vision 2030” proqramı çərçivəsində innovasiya ekosisteminin yaradılması məqsədilə süni intellekt, bulud hesablama və kvant texnologiyalarına yatırımlarını sürətləndirdiyi bir dövrdə həyata keçirilir.
