BAKI,VOA,Yusif Şərifzadə
İranın xarici işlər naziri Abbas Əraqçi İran və ABŞ arasında əldə olunan memorandumda Livanla bağlı yer alan müddəalar barədə Livan parlamentinin sədri Nəbih Berriyə məlumat verib.
VOA xəbər verir ki, bu barədə Livanın rəsmi xəbər agentliyi məlumat yayıb.
Məlumata görə, Əraqçi memorandumda Livana qarşı hərbi əməliyyatların dayandırılması ilə bağlı müddəanın xüsusi əhəmiyyət daşıdığını vurğulayıb.
İranlı nazir bildirib ki, həmin müddəa razılaşmanın qüvvəyə mindiyi ilk gündən etibarən tam şəkildə və istisnasız tətbiq olunmalıdır.
Onun sözlərinə görə, bu öhdəliyin icrası yalnız ilkin mərhələ ilə məhdudlaşmamalı, danışıqlar üçün nəzərdə tutulan 60 günlük müddət ərzində də fasiləsiz davam etməlidir.
Əraqçi qeyd edib ki, razılaşmaya əməl olunmasına nəzarət etmək məsuliyyəti ABŞ və memorandumun təminatçı tərəflərinin üzərinə düşür.
Nazir vurğulayıb ki, Livanın təhlükəsizliyi və suverenliyinin qorunması memorandumun əsas prinsiplərindən biridir.
Tərəflər telefon danışığında bölgədəki son vəziyyət və Livanda sabitliyin qorunmasının vacibliyi ətrafında da fikir mübadiləsi aparıblar.
