BAKI,VOA,Yusif Şərifzadə
Birləşmiş Millətlər Təşkilatının Livandakı Müvəqqəti Qüvvələri Livanın cənubunda təhlükəsizlik vəziyyətinin nisbətən yaxşılaşmasına baxmayaraq, hələ də kövrək olaraq qaldığını açıqlayıb.
VOA xəbər verir ki, BMT-nin Livandakı Müvəqqəti Qüvvələri (UNIFIL) yaydığı bəyanatda iyunun sonlarından etibarən bölgədə zorakılıq hallarının azaldığını bildirib.
Açıqlamada qeyd olunub ki, gərginliyin azalması sülhməramlı qüvvələrə Livanın cənubunda fəaliyyətlərini mərhələli şəkildə genişləndirməyə imkan verib.
UNIFIL bildirib ki, ailələrin öz yaşayış məntəqələrinə qayıtmağa başlaması fonunda sülhməramlılar əldə olunan nisbi sabitliyin möhkəmləndirilməsi üçün bölgədə iştiraklarını artırırlar.
Təşkilatın məlumatına görə, sülhməramlılar tərəflər arasında baş verən hadisələri izləyir, yerli icmalarla əlaqə saxlayır və mümkün istiqamətlərdə dəstək göstərirlər.
BMT qüvvələri həmçinin zədələnmiş yolların və digər infrastruktur obyektlərinin bərpasına kömək etdiklərini, bunun həm bölgənin bərpasına, həm də öz fəaliyyətlərinin səmərəliliyinin artırılmasına xidmət etdiyini vurğulayıb.
