BAKI,VOA,Yusif Şərifzadə
Qətərdən olan diplomatların ABŞ və İran arasında əldə olunmuş anlaşma memorandumunu qorumaq və gərginliyi azaltmaq məqsədilə İrana səfər etdiyi bildirilir.
VOA xəbər verir ki, diplomatik mənbələrə görə, Qətər nümayəndə heyəti İran rəsmiləri ilə görüşlər keçirərək regionda artan qarşıdurmanın qarşısının alınması və danışıqlar prosesinin davam etdirilməsi üçün yollar axtarır.
Məlumata görə, bu səylər ABŞ və İran arasında üç həftə əvvəl imzalanmış anlaşma memorandumunun qorunmasına yönəlib.
Qətər və Pakistan aylarla davam edən danışıqlarda mühüm vasitəçilik rolunu oynayıb və tərəflər arasında əldə olunan razılaşmanın uğursuzluğa düçar olmaması üçün diplomatik təşəbbüsləri davam etdirirlər.
Qətər nümayəndələrinin məqsədinin mövcud razılaşmanın əsas müddəalarını möhkəmləndirmək və daha geniş sülh çərçivəsinin yaradılması üçün şərait formalaşdırmaq olduğu bildirilir.
Diplomatik fəaliyyət ABŞ və İran arasında gərginliyin yenidən artdığı, region ölkələrinə qarşı hücumların baş verdiyi bir vaxtda həyata keçirilir.
