BAKI,VOA,Yusif Şərifzadə
İsrail ordusunun bölmələri Livanın cənubunda yerləşən Beyt Yəhun qəsəbəsinin şərq hissəsinə daxil olub. Əraziyə üç tank və bir neçə buldozerin cəlb edildiyi bildirilir.
VOA xəbər verir ki, Livanın Milli Xəbər Agentliyinin məlumatına görə, İsrail qüvvələri Beyt Yəhun istiqamətində irəliləyərək bölgədə hərbi fəaliyyətini genişləndirib. Hadisənin təfərrüatları ilə bağlı əlavə məlumat açıqlanmayıb.
Məlumata əsasən, İsrail qüvvələri Livanın cənubundakı Hula yaşayış məntəqəsində də yanğınlar törədib. Nəticədə yaşayış evlərinə və zeytun bağlarına ziyan dəyib.
Bundan əvvəl İsrail hərbi təyyarələrinin Əl-Mənsuri qəsəbəsinə hava zərbəsi endirdiyi, Nəbatiyyə bölgəsində isə bir neçə yaşayış evinin partladıldığı barədə məlumat yayılmışdı. Bölgədə gərgin vəziyyətin davam etdiyi bildirilir.
