BAKI,VOA, Fərid Mikayılov
Oman xarici işlər naziri Seyid Bədr Əlbusəidi Fars körfəzi regionunun təhlükəsizlik arxitekturasında əsaslı dəyişikliklərə ehtiyac olduğunu bildirib və İranın “təhdid” kimi təqdim edilməsinin yanlış yanaşmaya əsaslandığını deyib.
VOA xəbər verir ki, uzun illər davam edən “İranı cilovlama” siyasəti regionun təhlükəsizlik problemlərini həll etməyib və əksinə, hərbiləşmənin artmasına səbəb olub.
Omanlı nazirin fikrincə, İran təhlükəsi adı altında ABŞ hərbi bazalarının genişləndirilməsi və müdafiə xərclərinin artırılması həyata keçirilib, lakin bu addımlar bölgədə sabitliyi təmin edə bilməyib.
Əlbusəidi Fars körfəzində təhlükəsizlik sisteminin 1979-cu ildən sonra əsasən “məhdudlaşdırma” konsepsiyası üzərində qurulduğunu qeyd edib. Onun sözlərinə görə, bu siyasət İranı regional təhlükəsizlik sistemindən kənarda saxlamaq və Qərbin maraqlarını qorumaq məqsədi daşıyıb.
Oman xarici işlər naziri bildirib ki, bu yanaşmanın əsas problemi İranın heç vaxt təqdim edildiyi kimi “ekzistensial təhlükə” olmaması ilə bağlıdır.
Əlbusəidi region ölkələrini ayrı-seçkiliyə əsaslanan təhlükəsizlik modelindən imtina etməyə və bütün tərəflərin iştirak etdiyi əməkdaşlıq əsaslı yeni təhlükəsizlik çərçivəsinə keçməyə çağırıb.
Onun açıqlamaları İsrailin Yaxın Şərqdə həyata keçirdiyi hərbi əməliyyatların fonunda verilib. Oman rəhbərliyi daha əvvəl də regionda gərginliyin əsas mənbəyi kimi İsrail siyasətini tənqid edib və diplomatik həll yollarını dəstəklədiyini bildirib.
