BAKI,VOA,Yusif Şərifzadə
Birləşmiş Krallığın Dəniz Ticarət Əməliyyatları İdarəsi (UKMTO) Birləşmiş Ərəb Əmirliklərinin Füceyrə limanı yaxınlığında bir gəminin naməlum mərmi ilə vurulduğunu açıqlayıb. Hadisə nəticəsində gəminin idarəetmə sisteminin zədələndiyi bildirilib.
VOA xəbər verir ki, UKMTO-nun məlumatına görə, gəmi BƏƏ-nin Dibba şəhərindən 17 dəniz mili şərqdə yerləşən ərazidə hücuma məruz qalıb. Gəminin heyəti naməlum mərminin gəminin üzərinə düşdüyünü və sükan sisteminə zərər vurduğunu bildirib.
Məlumata əsasən, hadisə zamanı gəmidə olan bütün heyət üzvləri təhlükəsiz vəziyyətdədir. Hadisədən sonra gəminin vəziyyətinin qiymətləndirilməsi aparılır.
UKMTO hücumun mənbəyi və məsul tərəfi barədə məlumat verməyib. Hadisə Hörmüz boğazı və Ərəb dənizi ətrafında gəmiçilik təhlükəsizliyi ilə bağlı narahatlıqların artdığı bir vaxtda baş verib.
Bölgədə ABŞ və İran arasında davam edən gərginlik fonunda kommersiya gəmilərinə qarşı mümkün hücumlarla bağlı xəbərdarlıqlar artır.
