BAKI,VOA,Yusif Şərifzadə

Livanın xarici işlər naziri Yusif Rəcci ölkə ordusunun üzərinə düşən vəzifələri yerinə yetirmək üçün zəruri imkanlara malik olduğunu bildirib. O, eyni zamanda Hizbullahı sərt tənqid edərək təşkilatın silahsızlaşdırılmasının vacibliyini vurğulayıb.

VOA xəbər verir ki, Yusif Rəcci X sosial şəbəkəsində paylaşdığı bəyanatda Livanın məqsədinin işğaldan və qanunsuz silahlardan azad, yenidən qurulmuş, firavan və demokratik dövlət qurmaq olduğunu qeyd edib. Onun sözlərinə görə, belə bir Livan həm qonşuları, həm də beynəlxalq ictimaiyyətlə sülh şəraitində yaşamalıdır.

Rəcci bildirib ki, Livan ordusu bu missiyanı yerinə yetirmək üçün zəruri imkanlara malikdir və ölkənin təhlükəsizliyinin təmin edilməsində əsas rol oynamalıdır.

Xarici işlər naziri Hizbullah barədə danışarkən təşkilatın "adı livanlı, mahiyyəti isə iranlı" olduğunu iddia edib. O əlavə edib ki, Hizbullah silahsızlaşdırılmayana qədər onun siyasi və hərbi qanadları arasında fərq qoymağın mənası yoxdur.

Hizbullah isə Yusif Rəccinin açıqlamaları ilə bağlı hələlik rəsmi mövqe bildirməyib.