BAKI,VOA,Yusif Şərifzadə

Livan parlamentinin sədri Nəbih Berri ölkə ordusunun əsas missiyasının vahid Livanı qorumaq olduğunu bildirib və İsrailin təşəbbüsü ilə yaradıldığı deyilən "pilot zonaları" tənqid edib.

VOA xəbər verir ki, Livan ordusunun yaradılmasının 81-ci ildönümü münasibətilə yayımladığı bəyanatda Berri ordunu ölkənin birlik və suverenliyinin əsas dayağı adlandırıb.

"81 il sonra da Livan ordusu birlik, kimlik, mənsubiyyət, fədakarlıq və sədaqətin nümunəsi olaraq qalır. O, İsrail işğalçısının od, qətl və dağıntılarla sərhədlərini müəyyənləşdirdiyi "pilot zonaları" deyil, vahid Livanı müdafiə edir", – deyə Berri vurğulayıb.

"Əməl" Hərəkatının lideri olan Berri Livan ordusunu ölkədə bütün təbəqələri təmsil edən milli institut kimi qiymətləndirib. O, ordunun ölkənin suverenliyini qorumasına, torpaqların və vətəndaşların təhlükəsizliyinin təmin edilməsinə, sabitlik və vətəndaş sülhünün möhkəmləndirilməsinə ümid etdiyini bildirib.

Berrinin açıqlaması ABŞ-nin vasitəçiliyi ilə Livan və İsrail arasında əldə olunduğu bildirilən çərçivə razılaşması fonunda səslənib. Həmin razılaşmaya əsasən, Livanın cənubunda "pilot zonaları" yaradılır, Livan Silahlı Qüvvələri bu ərazilərdə yerləşdirilir, İsrail qüvvələrinin isə mərhələli şəkildə geri çəkilməsi nəzərdə tutulur. İyulun 20-də istifadəyə verilən ilk üç zona Frun, Srifa və Zəvtər əl-Qərbiyə kəndlərini əhatə edir.

Livan və İsrail arasında razılaşmanın tətbiqi ilə bağlı proses davam edir. Tərəflər bəzi məsələlər üzrə fərqli mövqelərini qoruyurlar.