BAKI,VOA,Yusif Şərifzadə

Qəzza Səhiyyə Nazirliyi son 48 saat ərzində İsrailin Qəzza zolağına endirdiyi hücumlar nəticəsində 7 fələstinlinin öldüyünü, 76 nəfərin isə yaralandığını açıqlayıb.

VOA xəbər verir ki, nazirliyin yaydığı məlumata əsasən, bundan əlavə, əvvəlki hücum zamanı yaralanan daha bir nəfər aldığı xəsarətlərdən həyatını itirib.

Məlumatda bildirilir ki, ötən il qüvvəyə minmiş atəşkəsdən sonra indiyədək 1 222 nəfər həlak olub, 4 053 nəfər isə yaralanıb.

Nazirlik həmin dövrdə dağıntılar altından 804 nəfərin meyitinin çıxarıldığını da açıqlayıb.

Qurumun məlumatına görə, 2023-cü il oktyabrın 7-dən bəri Qəzza zolağında həlak olanların sayı 73 349 nəfərə, yaralananların sayı isə 174 162 nəfərə çatıb.

Bundan əlavə, bir nəfərin binanın uçması nəticəsində ölməsi ilə tikililərin çökməsi nəticəsində həyatını itirənlərin ümumi sayı 33 nəfərə yüksəlib.

Qəzza Səhiyyə Nazirliyinin açıqladığı məlumatlar müstəqil mənbələr tərəfindən təsdiqlənməyib.